Qazaqstannyń 194 myńnan astam azamaty shetelde jumys istep júr - mınıstr

ASTANA. QazAqparat – Qazaqstan azamattarynyń shetelde eńbek quqyqtaryn qorǵaıtyn jańa kelisimderge bastamashylyq etý úshin qosymsha sharalar qabyldandy. Bul týraly Úkimet otyrysynda Kóshi-qon saıasaty tujyrymdasyn iske asyrý barysyn talqylaý kezinde Premer-Mınıstrdiń orynbasary – Eńbek jáne halyqty áleýmettik qorǵaý mınıstri Tamara Dúısenova aıtty, dep habarlaıdy QazAqparat tilshisi.

«Syrtqy ister mınıstrliginiń derekterine júginsek, bıylǵy birinshi toqsandaǵy esep boıynsha Qazaqstannyń 194 myńnan astam azamaty shetelde jumys istep júr. Biz Túrkııa, Birikken Arab Ámirlikteri, Ulybrıtanııa jáne basqa da eldermen ondaǵy Qazaqstan azamattarynyń eńbek quqyqtaryn qorǵaıtyn jańa kelisimderge bastamashylyq etý úshin qosymsha sharalar qabyldadyq», - dedi T. Dúısenova.

Onyń aıtýynsha, azamattarymyz Ońtústik Koreıada jumysqa zańdy túrde ornalasýy úshin Qazaqstandy «Eńbekke ruqsat berý júıesine» (Employment permit System – EPS) qosý máselesi pysyqtalyp jatyr.

Bul rette, migration.enbek.kz saıtyna tirkele otyryp, osy júıe arqyly jumysqa ornalasýǵa bolady. Ony eńbek utqyrlyǵy ortalyqtary júzege asyrady. Shetelde jumys istegisi kelgen adam aldymen til úırenedi, mindetti medıtsınalyq tekserýden ótedi, sosyn shetelge shyǵatyn qujattaryn rásimdeıdi.

Budan buryn habarlanǵandaı, Qazaqstanǵa negizinen qaı eldiń azamattary qonys aýdaryp jatqany anyqtaldy.