Qazaqstannyń 19 qalasynda SPT olımpıadasy bastaldy
ASTANA. QazAqparat - Súleımen Demırel atyndaǵy Ýnıversıtettiń (SDÝ) uıymdastyrýymen Astanada 12 myń mektep oqýshysy men kolledj stýdentteri SPT olımpıadasy ózara myqtyny anyqtaýda, dep habarlaıdy «QazAqparat» HAA tilshisi.
SDU Proficiency Test (SPT) - mektep jáne kolledj túlekterine arnalǵan SDÝ-dyń ishki olımpıadasy. Olımpıadanyń negizgi maqsaty - talapkerlerge bolashaq mamandyǵyn tańdaýǵa kómektesip, túrli deńgeıdegi grant pen jeńildik berý. Olımpıadada árbir oqýshy ózi tańdaǵan baǵyty boıynsha bilimin kórsete otyryp, SDÝ-dyń ishki grantyna nemese jeńildigine ıe bola alady.
«Bıyl olımpıadada 12 myń qatysýshy ózara baǵyn synap jatyr. Bizdiń ýnıversıtet ınjenerııa, ІT-mamandyqtar men baǵdarlamalaý salasynda áıgilengendikten abıtýrıentterdiń kópshiligi bizdiń oqý ordasyna túskisi keledi. Qazaqstannyń barlyq mektepteri men kolledjderinen oqýshylar men stýdentter qatysýda. Negizgi úsh mamandyqqa - ІT, bıznes-mektep pen fılologııada báseke myqty. Qatysýshylar fızıka, geografııa, hımııa, bıologııa, ádebıet, aǵylshyn tili men tarıh pánderinen emtıhan tapsyrady. Eger bizdiń grantty utyp alsa, talapker Ulttyq biryńǵaı testileýde bar bolǵany 50 ball alsa bolǵany», - deıdi SDÝ-dyń halyqaralyq qatynastar jónindegi keńsesiniń bas sarapshysy Aıdyn Baıqurmanov.
Olımpıada búgin saǵat 11:00 ýaqytynda elimizdiń 19 qalasynda: Astana, Almaty, Shymkent, Qyzylorda, Taldyqorǵan, Taraz, Túrkistan, Jezqazǵan, Aqtaý, Atyraý, Aqtóbe, Oral, Pavlodar, Petropavl, Qostanaı, Kókshetaý, Semeı, Óskemen, Qaraǵandyda bastaldy. Úzdik nátıje kórsetken 300 talapker 4 jylǵa jaramdy 100% grant pen arnaıy jeńildikterge ıe bolady.
Іs shara barysynda ashyq esik kúni, kásiptik baǵdar berý jumystary, bilim berý kórmesi jáne aýqymdy mádenı baǵdarlama ótkizilmek.
