Qazaqstannyń 17 qalasy ıÝNISEF-tiń jahandyq bastamasyna qosylǵan
ASTANA. 18 mamyr. QazAqparat - Búgin Almatyda BUU Balalar qorynyń jahandyq bastamalarynyń biri - Qazaqstan Respýblıkasyndaǵy Balaǵa meıirimdi qalalardyń ІІІ respýblıkalyq forýmy ótýde,
dep habarlaıdy pm.kz saıty QR Bilim jáne ǵylym mınıstrliginiń baspasóz qyzmetine silteme jasap.
Forým jumysyna balaǵa meıirimdi qala ákimderiniń orynbasarlary, BUU Balalar qorynyń (ıÝNISEF) ókilderi, úkimettik emes uıym ókilderi, pedagogtar, balalar men jasóspirimder uıymdarynyń kóshbasshylary, barlyǵy 70-ten astam adam qatysýda.
Kezdesýdiń negizgi maqsaty - keleshegi kemel balalyq shaqqa jaǵdaı jasaý, qalanyń barlyq mańyzdy tirshilik salasynda balalarǵa sapaly qyzmet kórsetý jónindegi jumystardy úılestirý, qoǵamdyq uıymdarǵa, eriktiler birlestikterine, balalar men jastar máslıhatyna qatystyrý arqyly balalar men jastardy áleýmettik beıimdeý úshin yntymaqtastyq strategııalardy anyqtaý bolyp tabylady.
«Forým qatysýshylaryna BUU Balalar qorymen birlese otyryp ázirlengen balalarǵa meıirimdi qalalardy akkredıtatsııalaý jáne sertıfıkattaý úlgisi tanystyrylady», - delingen QR Bilim jáne ǵylym mınıstrliginiń habarlamasynda.
«Balaǵa meırimdi qala» - bul 1996 jyly BUU-nyń eldi mekender jóninde ótken Ekinshi konferentsııasynda alǵash ret jarııa etilgen BUU Balalar qorynyń jahandyq bastamasy bolyp tabylady. «Balaǵa meırimdi qala» bastamasy bala quqyǵy týraly Konventsııanyń barynsha tolyq oryndalýyna kómektesýge baǵyttalǵan balalardyń ómir súrý deńgeıiniń jaqsarýyna kómektesetin jergilikti baqarý strategııasy bolyp tabylady. Balaǵa meıirimdilik tanytqysy kelgen qala bala quqyqtary týraly Konventsııanyń ustanymdaryna sáıkes jergilikti basqarý júıesin jasap shyǵarýy kerek.
Bilim jáne ǵylym mınıstrliginiń málimetine súıensek, 2006 jyldan bastap búgingi kúnge deıin Qazaqstannyń 17 qalasy jahandyq bastamaǵa qosylǵan (Astana, Almaty, Saran, Sátbaev, Balqash, Abaı, Osakarovka, Semeı, Óskemen, Aqsý, Ekibastuz, Pavlodar, Aqsaı, Qyzylorda, Petropavl, Aqtóbe, Shymkent qalalary). QR Bilim jáne ǵylym mınıstrliginiń balalar quqyǵyn qorǵaý Komıteti osy qalalardyń ákimdikterimen memorandýmdarǵa qol qoıdy.
Osy qalalarda balalar men otbasylardyń jaǵdaılary zerttelip, vedomstvoaralyq úılestirý keńesteri quryldy, halyqaralyq bastamany júzege asyrýdyń strategııalyq baǵdarlamasy ázirlenip, qabyldanǵan.
Halyqaralyq bastamany júzege asyryp otyrǵan qalalarda «Balaǵa meıirimdi emhanalar», «Balaǵa meıirimdi kitaphanalar» (Balqash qalasy) jobalary engizilip, «Ákeler keńesi» (Sátbaev qalasy), Otbasy men balalardy qoldaý ortalyǵy (Óskemen qalasy) jumys isteıdi.
