Qazaqstannyń 16 jasar sportshysy Zúlfııa Chınshanlo Álem chempıony atandy
ASTANA. Qarashanyń 23-i. QazAqparat /Aıdyn Báımen/ - Keshe, qarashanyń 22-si kúni Qazaqstan sporty aıryqsha jetistigimen álemdi tańǵaldyrdy. Ońtústik Koreıanyń Goıang qalasynda aýyr atletıkadan ótip jatqan Álem birinshiliginde Qazaqstannyń 16 jasar sportshysy Zúlfııa Chınshanlo Álem chempıony atandy,
dep habarlaıdy QazAqparat.
Zúlfııa Chınshanlo eki-úsh jyl buryn Qytaı elinen kóship kelgen dúngen qyzy. Osy jyly mamyr aıynda Taılandta ótken jasóspirimder arasyndaǵy dodada 58 keli salmaqta qola júldege ıe boldy.
Osy joly Zúlfııa áıelder arasyndaǵy jarysqa túsip, 53 keli salmaq boıynsha Álem jeńimpazy atandy. Ol julqa kóterýden 90 keli salmaqty baǵyndyryp, birinshi jattyǵýdan keıin 5-shi orynda turdy. Julqa kóterýde 95 kelini kótergen qytaılyq Chen Sıaotın kósh bastap turǵan bolatyn. Alaıda, ulttyq quramanyń bas bapkeri Alekseı Nıdiń sheber tásil qoldana bilýiniń arqasynda, qazaqstandyq sportshy áýeli serpe kóterýde 120 kelini, ekinshi ret shyqqan kezde 125 kelini baǵyndyrdy. Al altynnan birden bir úmitker qytaılyq sportshy Chen Sıaotın serpe kóterýde 123 kelini qanaǵat tutty. Eń sońǵy múmkindiginde qazaqstandyq Z. Chınshanlo 129 kelini kóterip, Álem rekordyn qaıtalady jáne bas júldeni jeńip aldy.
Álem birinshiligi jalǵasýda.
