Qazaqstannyń 16 aýmaǵynda aýmaqtyq sımýlıatsııalyq ortalyqtary qurylady
ASTANA. QazAqparat - Qazaqstannyń 16 aýmaǵynda aýmaqtyq sımýlıatsııalyq ortalyqtary qurylady, dep habarlady Densaýlyq saqtaýdy damytý respýblıkalyq ortalyǵynyń baspasóz qyzmetinen.
Mundaǵy maqsat - joǵary oqý ornynan keıingi bilimdi jetildirý, jańa tehnologııalardy engizý, sımýlıatsııalyq oqytýdy damytý, táýelsiz baǵalaý ınstıtýtyn qurý.
«Biz biliktilik sanatyn berý úshin barlyq mamandardy Astana men Almatyǵa jibere almaımyz, óıtkeni bul ekonomıkalyq jaǵynan tıimsiz. Sondyqtan barlyq 16 óńirde aýmaqtyq sımýlıatsııalyq ortalyqtaryn qurý jóninde sheshim qabyldandy. Barlyq aýmaqta medıtsınalyq JOO joqtyǵyn eskere otyryp, ondaǵy úılestirý jumystaryn medıtsınalyq kolledjderge júkteý týraly sheshim qabyldandy», - dedi QR DSM Ǵylym jáne adamı resýrstar departamentiniń dırektory Alma Syzdyqova.
Aýmaqtyq sımýlıatsııalyq ortalyqtar negizinde densaýlyq saqtaý mamandary biryńǵaı ádis arqyly jedel kómek berý boıynsha oqýdan ótedi, kásibı daıyndyǵy men biliktilik talaptaryna sáıkestigi baǵalanady.
