Qazaqstannyń 14 kolledjiniń stýdentteri kásibı sheberlikte baq synasady

QARAǴANDY. QazAqparat - WorldSkills Kazakhstan 2021 VI respýblıkalyq kásibı sheberlik chempıonatynda Qazaqstannyń 14 kolledjiniń stýdentteri úzdik ataný úshin kúresip jatyr. Elimizdiń 17 óńirinen 22 jasqa deıingi 450-den astam adam WorldSkills-tiń 30 negizgi jáne 40-tan astam qosymsha quzyreti boıynsha jarysady, dep habarlaıdy QazAqparat tilshisi.

Chempıonat 10 jeltoqsanǵa deıin ótedi. Baıqaýǵa qatysýshylardy 500-ge jýyq sarapshy baǵalaıdy.

Negizgi quzyretter boıynsha jarystar Nur-Sultan, Almaty, Aqtaý, Atyraý, Kókshetaý, Qostanaı, Qaraǵandy jáne Semeı kolledjderiniń 18 jarys alańdary bazasynda ótedi.

«3 qarashada Qaraǵandy tehnologııa jáne servıs kolledjiniń alańynda «Sán tehnologııasy» quzyrettiligi boıynsha óz óńirleriniń 14 úzdik ókilderi arasynda jarys bastaldy. Baıqaýdyń ashylýyna oblys ákiminiń orynbasary Abzal Núkenov, bilim basqarmasy men bilim berýdi damytý oqý-ádistemelik ortalyǵynyń, «Talap» KEAQ ókilderi, kolledj pedagogtary men stýdentteri qatysty», – dedi Qaraǵandy oblysynyń bilim berýdi damytý oqý-ádistemelik ortalyǵy dırektorynyń orynbasary Tatıana Nartova.

Aıta ketý kerek, WorldSkills qozǵalysy 1946 jyly paıda boldy. 2014 jyly oǵan Qazaqstan qosyldy.

Elimizde servıstik jáne ındýstrııalyq mamandyqtardyń mártebesin arttyrý úshin 2015 jyldan bastap jyl saıyn óńirlik jáne respýblıkalyq deńgeılerde 2 myńnan astam konkýrsanttar men sarapshylardyń qatysýymen WorldSkills chempıonattary ótkiziledi.

Osy jyldar ishinde Qazaqstan ulttyq quramasy Brazılııa, Shvetsııa, BAÁ, Vengrııa, Reseı, Avstrııada ótken alty halyqaralyq chempıonatqa qatysty.

Bizdiń qorjynymyzda «Veb-ázirleý» quzyretindegi qola medal bar.