Qazaqstannyń 135 sportshysy Qazan qalasyndaǵy Ýnıversıadaǵa attandy
ASTANA. 5 shilde. QazAqparat - 6-17 shilde aralyǵynda Qazan qalasynda ótetin Ýnıversıada-2013 jarysynyń aldynda Qazaqstan Respýblıkasynyń Týyn kóterý saltanaty ótti.
Bul týraly sports.kz habarlaıdy.
Oǵan Ýnıversıada aýylynyń vıtse-meri Insaf Galıýllın jáne Halyqaralyq stýdenttik sport federatsııasynyń (FISU) ókilderi qatysyp, sportshylarǵa jeńis, jankúıerlerge jarqyn áser tiledi.
Qazaqstandyq delegatsııanyń jetekshisi, QR BǴM Ulttyq ǵylymı-tájirıbelik dene tárbıesi ortalyǵy bas dırektorynyń orynbasary Baýyrjan Ramazanov Ýnıversıada qojaıyndaryna ystyq qabyldaýlary úshin alǵysyn bildirip, qazaqstandyq 135 sportshy jarystyń 14 túri boıynsha baq synaıtynyn atap ótti.
Qazaqstandyq stýdentter Búkilálemdik Qysqy jáne Jazǵy ýnıversıadalarǵa 1993 jyldan beri qatysyp, qanjyǵalary 18 altyn, 21 kúmis, 29 qola medalmen maılandy. Stýdentterdiń eń sátti óner kórsetýleri 2007 jyly Taılandta boldy, onda bizdiń qurama 165 memlekettiń arasynda 11-inshi orynǵa turaqtady. Sol stýdenttik quramada elimizdiń namysyn bolashaq Olımpıada chempıony Olga Rypakova da qorǵaǵan bolatyn.
Eske sala keteıik, Qazandaǵy XXVII Búkilálemdik Jazǵy ýnıversıadada 162 memlekettiń 12 myń sportshysy sheberlikterin ortaǵa salady. Sporttyń 27 túri boıynsha medaldardyń 351 jıyntyǵy báske tigilip otyr.
