Qazaqstannyń 1300 sportshysy Aqtóbedegi aýyl oıyndaryna jınaldy
AQTÓBE. QazAqparat - Aqtóbede «Aq bıdaı» respýblıkalyq VI aýyl sporty oıyndary ótip jatyr, dep habarlaıdy QazAqparat tilshisi.
Aıta keteıik, «Aq bıdaı» aýyl sporty oıyndarynan jarystar Aqtóbede tuńǵysh ret ótýde. Tórt jylda bir ret ótkiziletin jarysqa elimizdiń ár óńirinen 1300 sportshy qatysýda. Olar bir apta boıy sporttyń 14 túrinen synǵa túsedi. Teń jartysy ulttyq oıyn túrleri. Sportshylardyń deni túrli jarystardyń jeńimpazdary men júldegerleri.
«Aqtóbe komandasy 2013 jyly ótkizilgen jarysta 7-oryn aldy. Bıyl júldegerler qatarynan kórinýge nıettimiz. Jarys bastaldy. Qazirgi ýaqytta kókpar, aýdaryspaq, voleıbol, shaǵyn fýtbol sekildi birneshe sport túrinen jarystar ótýde. Ulttyq sport túrlerinen alaman báıge, kókpar tartý, teńge ilý, asyq atý, aýdaryspaq, qazaq kúresi kórermen qyzyǵýshylyǵyn týdyryp jatyr. Biz oblystyq jarysta úzdik shyqqan sportshylarǵa senim artyp otyrmyz», - dedi oblystyq sport basqarmasynyń basshysy Nurlybek Júsipov.
Sportshylar respýblıkalyq jarysqa úlken daıyndyqpen kelgen. Jarystyń alǵashqy kúni jeńimpazdar anyqtaldy.
«Ońtústik Qazaqstan oblysynan aýdaryspaqqa 5 sportshy keldi. 80 keli salmaqta Aqtóbeniń sportshysymen jarysqa túsip, jeńimpaz atandym. «Aq bıdaı» aýyl sporty oıyndaryna alǵash ret qatysyp otyrmyn. Úlken daıyndyqpen kelip, jeńiske jettim»,- deıdi OQO ókili Esimhan Rahmattillá.
«Aq bıdaı» aýyl sporty oıyndaryn ótkizýge jergilikti bılik 5 mıllıon teńgeden astam qarjy jumsady.
«Daryndylar men aty ańyzǵa aınalǵan sportshylarymyz qaımaǵy buzylmaǵan qasıetti aýyldan shyqqan. Sondyqtan bul spartakıada aýyl sportynyń abyroıyn ósirip, damytady»,- dedi oblys ákiminiń orynbasary Erbol Nurǵalıev.
