Qazaqstannyń 12 oblysynda koronavırýs juqtyrý deńgeıi qaıta ósip barady
NUR-SULTAN. QazAqparat – Qazaqstannyń 12 oblysynda koronavırýs juqtyrý deńgeıi qaıta ósip barady. Bul týraly Densaýlyq saqtaý mınıstrliginiń Sanıtarlyq-epıdemıologııalyq baqylaý komıtetiniń tóraıymy Aıjan Esmaǵambetova málim etti, dep habarlaıdy QazAqparat tilshisi.
«Qazaqstandaǵy epıdemıologııalyq jaǵdaıǵa taldaý jasaı otyryp, sońǵy aptada aldyńǵa aptadan qaraǵanda aýrý juqtyrý deńgeıi 1,2 ese artqanyn atap ótemiz. Aýrý juqtyrý deńgeıi respýblıkanyń 12 óńirinde baıqalady», - dedi Aıjan Esmaǵambetova OKQ-da ótken baspasóz máslıhatynda.
Komıtet basshysy sonymen birge oqýshylardyń koronavırýs juqtyrý jaǵdaıyna turaqty túrde monıtorıng júrgizilip kele jatqanyn atap ótti.
«Oqý jyly bastalǵaly beri oqýshylardyń arasynda 250 bala koronavırýs ınfektsııasyn juqtyryp aldy. Olardyń ishinde kezekshi synypta oqıtyn balalardyń sany – 105 jaǵdaı. Osy balalarmen qarym-qatynasta bolǵan 1426 adam anyqtaldy. Sol adamdardyń ishinde 19 kisiniń koronavırýs juqtyrǵany belgili boldy», - dedi ol.
Aıjan Esmaǵambetova qashyqtan oqyp jatqan oqýshylardyń ishinde de vırýs juqtyrǵandary tirkelgenin málim etti.
«Bul baǵytta juqtyrýdyń 145 jaǵdaıy tirkeldi. Olarmen baılanysta bolǵan 348 adam anyqtalyp, sonyń ishinde koronavırýs juqtyrǵan 22 adam belgili boldy», - dedi ol.
