Qazaqstannyń 11 shaharyna «Dańqty eńbek qalasy» ataǵyn berý usynyldy
NUR-SULTAN. QazAqparat – Reseıdiń tarıhı qoǵamy ІІ dúnıejúzilik soǵystaǵy jeńiske baǵa jetpes úles qosqan Qazaqstannyń eldi mekenderine «Dańqty eńbek qalasy» ataǵyn berýdi usyndy, dep habarlaıdy QazAqparat QR Qorǵanys mınıstrliginiń baspasóz qyzmetine silteme jasap.
Tizimde on bir qala bar. Olar – Nur-Sultan, Almaty, Shymkent, Aqtóbe, Qaraǵandy, Qostanaı, Petropavl, Semeı, Taraz, Oral, Óskemen.
«Jeńistiń 77 jyldyǵy qarsańynda ata-babamyzdyń erligin eske alýǵa degen turaqty baǵytymyzdy rastaıtyn mańyzdy is-shara ótkizilip otyr. Reseıde qurylǵan «Dańqty eńbek qalasy» jobasy Qazaqstanda da tıisti jalǵasyn tabady. Qazaqstan soǵys jyldarynda «maıdan arsenaly» men shıkizat jáne azyq-túlik bazasyna aınalǵany, qorǵanys ónerkásibiniń negizgi bóligin qajetti otynmen qamtamasyz etkeni, kómir, tústi metall óndirgeni, evakýatsııalanǵan 220 fabrıka men zaýytty qabyldaǵany barshaǵa málim», - dedi QR Qorǵanys mınıstriniń orynbasary, general-leıtenant Sultan Qamaletdınov Reseı tarıhı qoǵamynyń delegatsııasymen kezdesýde.
Delegatsııa memlekettik áskerı-tarıhı mýzeıge qazaqstandyq jaýyngerlerdiń ІІ dúnıejúzilik soǵystaǵy qaharmandyǵy týraly biregeı muraǵattyq qujattar men materıaldardy tabys etti.
Qazaqstannan maıdanǵa attanǵandardyń jalpy sany - shamamen 1,2 mln adam, olardyń teń jartysy soǵystan oralmady. 12-shi atqyshtar jáne 4-shi atqyshtar dıvızııasy, 7-shi atqyshtar brıgadasy jáne polkter men batalondardyń 50-ge jýyǵy bizdiń elde quryldy.
Soǵystaǵy erligi úshin 500-ge jýyq qazaqstandyq Keńes Odaǵynyń Batyry ataǵyn aldy.
Sondaı-aq, 700 myńnan astam adam ónerkásipke jumyldyryldy. Qazaqstan 35% mys, 83% qorǵasyn, 60% molıbden, 65% vısmýt óndirdi. Qaraǵandy oblysy 35 mln tonna kómir berdi. Osy ýaqyt ishinde tyl eńbekkerleri 5 mln tonnadan astam nan jáne 700 myń tonnadan astam et óndirdi.
Maıdan dalasynda atylǵan 10 oqtyń 9-y qazaqstandyq qorǵasynnan quıylǵany barshaǵa aıan.
Buǵan deıin habarlaǵanymyzdaı, II Dúnıejúzilik soǵysta Norvegııada jerlengen taǵy 18 qazaqstandyqtyń esimi anyqtaldy.
