Qazaqstannyń 11 óńirinde ekonomıkalyq damý kórsetkishteri joǵary – Rýslan Dálenov

NUR-SULTAN. QazAqparat – QR Ulttyq ekonomıka mınıstri Rýslan Dálenov óńirlerdiń ekonomıkalyq damý kórsetkishteri týraly aıtyp berdi, dep habarlaıdy QazAqparat tilshisi.

«Óńirlerde 7 ekonomıkalyq kórsetkish boıynsha jalpy jaǵdaı kelesideı. 5 kórsetkish boıynsha 11 óńirde ósý baıqalady. Olar: Aqmola, Aqtóbe, Almaty, Jambyl, Qostanaı, Mańǵystaý, Pavlodar, Soltústik Qazaqstan jáne Túrkistan oblystary jáne Nur-Sultan men Shymkent qalalary. Saýda boıynsha jaǵdaı jaqsaryp kele jatqanyn atap ótkim keledi. Oń aımaqqa 2 óńir shyqty. Olar Nur-Sultan jáne Shymkent qalalary.

Úsh óńirde 4 kórsetkish boıynsha ósý tirkeldi. Bul ortasha deńgeı. Taǵy 3 óńirde 1-2 kórsetkish boıynsha ǵana ósý baıqalady. Olar – Qyzylorda, Batys Qazaqstan jáne Atyraý oblystary», - dedi Rýslan Dálenov Úkimet otyrysynda.

Sonymen birge, Qazaqstanda qurylys sektory óte joǵary ósýdi kórsetip otyr. Oryndalǵan jumystardyń kólemi 12,1%-ke ósken.

«Belsendi qurylys jumystary Túrkistan (83,6%) jáne Jambyl (49,1%) oblystarynda, Shymkent qalasynda (59,3%) baıqalady. 12,1 mln sharshy metr turǵyn úı paıdalanýǵa berildi. Bul ótken jyldyń sáıkes kezeńimen salystyrǵanda 9,3%-ke joǵary», - deıdi mınıstr.