Qazaqstannyń 104 mektebinde 12 jyldyq oqý júıesine aýysý boıynsha tájirıbelik jumys júrgizilýde
ASTANA. 12 qańtar. QazAqparat - Qazaqstanda bilim salasyndaǵy strategııalyq mańyzdy máselelerdiń biri 12 jyldyq oqý modeline aýysý bolyp tabylady.
Jańa júıe respýblıkamyzǵa álemdik bilim keńistigine yqpaldasýǵa múmkindik beredi, dep habarlady pm.kz saıty.
«2020 jylǵa qaraı biz 12 jyldyq oqý modeline tolyq aýysamyz. Ol úshin 2015 jylǵa qaraı biz respýblıkalyq bıýdjettiń esebinen - 200 mektep, jergilikti bıýdjettiń esebinen de - sonsha mektep salamyz», - dep málim etti Elbasy Nursultan Nazarbaev «Bolashaqtyń irgesin birge qalaımyz!» atty Qazaqstan halqyna Joldaýynda.
Búgingi tańda elimizde 12 jyldyq oqý júıesine aýysý jónindegi is-sharalardyń jospary daıyn, onda oqý protsesin normatıvtik-quqyqtyq jáne ǵylymı-ádistemelik qamtamasyz etý qujattaryn ázirleýdiń merzimderi anyqtalyp otyr.
Orta bilim júıesindegi jumystar elektrondyq oqytý júıesin 90 paıyzǵa paıdalaný, 12 jyldyq modelge aýysý, Qazaqstannyń óńirlerinde Zııatkerlik mektepterin kóbeıtý baǵytynda júrgizilýde», - dedi Premer-Mınıstr Kárim Másimov «Nur Otan» HDP parlamenttik fraktsııasynyń keńeıtilgen otyrysynda.
Bilim jáne ǵylym mınıstrliginiń málimeti boıynsha, 12 jyldyq oqý júıesine aýysý úshin qazir elimizde ázirlik jumystary qolǵa alynǵan. Respýblıkanyń 104 mektebinde, onyń ishinde 45 aýyldyq, 59 qalalyq mektepte 12 jyldyq bilim júıesine aýysý jónindegi tájirıbelik jumystar júrgizilýde.
2011 jyly bastaýysh jáne 12 jyldyq bilim berýdiń memlekettik standarttarynyń negizgi erejeleri bekitildi, oqý pánderiniń quramy anyqtaldy, tájirıbeler júrgizilip bilim mazmuny tekserilip jatqan 1-8 synyptar úshin 12 jyldyq mektepterdiń oqýlyqtary men oqý-ádistemelik keshenderi ázirlendi.
Sonymen qatar, muǵalimderdi qaıta daıyndaý jáne olardyń biliktilikterin jetildirý boıynsha júıeli jumystar júrgizilýde. 2007-2011 jyldardyń aralyǵynda tájirıbe ótkizilip jatqan 8 mekteptiń 468 muǵalimi (71 paıyzy) pedagogıkalyq kadrlardyń biliktiligin jetildirý ınstıtýttarynda kýrstardan ótti.
Josparǵa sáıkes, 12 jyldyq bilim júıesine aýysý 2015-2016 oqý jyldaryna josparlanǵan. 2015 jyly - 1, 5, 11 synyptarda 12 jyldyq oqý modeliniń standarttaryn engizý bastalady. 2015-2016 oqý jylynda 1 synypqa baratyn oqýshylardyń sany 6-7 jastaǵy 624 myńnan astam balany quraıdy dep boljanýda. 2015 jyly 1 qyrkúıekte mektepterdegi oqýshylardyń sany, 2014 jylmen salystyrǵanda, 2 esege artady.
Barshaǵa aıan, jalpy bilim berýdi uıymdastyrýdyń álemdik tájirıbesi 12-13 jyldyq oqý júıesin qarastyrady. Eýropa Keńesiniń Ýnıversıtettik problemalar jónindegi turaqty konferentsııasy 1992 jyly «12 jyldyq bilim júıesi basym halyqaralyq tájirıbe ekendigi» atap kórsetilgen Deklaratsııa qabyldady. Deklaratsııaǵa sáıkes, álemdik bilim berý keńistiginde 12 jyldyq orta bilim júıese 136 elde júzege asyrylýda, olardyń qatarynda Avstralııa, Kanada, AQSh, Frantsııa, Japonııa jáne t.b. álemniń básekege qabiletti 50 memleketiniń qataryna kiretin elder bar.
Qazaqstanda 12 jyldyq bilim júıesine aýysý zamana talaptaryna jaýap beretin jańa maqsattardy saralaýǵa jáne Qazaqstannyń bilim berý júıesin álemdik bilim keńistigine yqpaldastyrýǵa múmkindik beredi.
