Qazaqstannyń 100 jańa tulǵasyn tańdaý boıynsha sharalar jospary jasaqtalýda
Bul týraly búgin «Bolashaqqa baǵdar, rýhanı jańǵyrý» atty Elbasy maqalasynda aıtylǵan «Qazaqstannyń 100 jańa tulǵasy» atty jobany júzege asyrý boıynsha qurylǵan jumys tobynyń otyrysynda Qazaqstan xalqy Assambleıasy Tóraǵasynyń orynbasary Darxan Myńbaı málim etti.
«Elimizge eleýli tulǵalardy izdestirý boıynsha bizdiń baǵytymyz qandaı bolady jáne onyń barysynda aqparattyń qandaı kózderi qoldanylady degen máselelerdi sizdermen birge talqylaǵymyz keledi. Bul óte mańyzdy, sebebi BAQ-ta bul tek ákimshilik tásilmen sheshiledi degen kúdik bar. Biz osyǵan laıyq azamattardy izdeýde qoǵamdyq aqparat kózderin de tartýymyz kerek. Sol úshin saıttardyń birinen «Qazaqstannyń bet-beınesi bolǵym keledi» degen aıdar ashaıyq. Azamattar men ÚEU-dar óz usynystaryn joldaı alady. Osylaısha, qoǵamdyq saraptama úlgisin engizer edik. Bul bizdiń jumys tobymyz úshin aqparattyń táýelsiz arnasy bolady. Jumys tobynyń xatshylyǵyna osyndaı tapsyrmany atqarýshylarǵa berýdi jáne usynysty engizýge aralyq merzimderdi taǵaıyndaýdy suraımyn», - dedi ol.
Onyń sózinshe, Qazaqstannyń 100 jańa tulǵasyn tańdaý jáne tanytý boıynsha sharalar josparyn 26 mamyrǵa deıin tııanaqtaý qajet. Kandıdattardy irikteý barysynda barlyq aımaqtar, azamattardyń barlyq sanattary qamtylýy tıis. Basty talap - eldiń damýyna eleýli úlesin tıgizý.
«Sonymen qatar júrgizilgeli otyrǵan sharalardyń qarjylyq tusyn aıqyndap alǵan jón. Mysaly, «Qazaqstannyń 100 jańa tulǵasy - Ulttyq altyn qory» atty antologııany jasaýǵa. Ol óz kezeginde oqıǵalardy ádebı óńdeýden ótkizýdi, sıýjettik jelisin qurý, basyp shyǵarý jumystaryn sheshýdi jáne ony taratýdy talap etedi», - dedi D. Myńbaı.
