Qazaqstannyń 100 muǵalimi úsh tilde bilim berýge arnalǵan jobalaryn tanystyrdy
NUR-SULTAN. QazAqparat – Qazaqstannyń bes aımaǵynan jınalǵan 100 muǵalim amerıkalyq Boll Steıt zertteý ýnıversıtetiniń úsh aptalyq baǵdarlamasyna qatysty, dep habarlaıdy QazAqparat tilshisi.
Baǵdarlamanyń jabylý saltanatynda 100 muǵalimnen jasaqtalǵan 25 komanda AQSh-tyń Qazaqstandaǵy ýaqytsha senimdi ókili Teodor Lıngke jáne Nazarbaev Ýnıversıtetiniń vıtse-prezıdenti Qadısha Daıyrovaǵa óz jobalaryn tanystyrdy.
2019 jyldyń sáýirinde Boll Steıt ýnıversıtetiniń professorlary Qaraǵandy, Qostanaı, Pavlodar, Óskemen jáne Aqtóbe qalalarynyń 50 ǵylymı-jaratylystaný pánderi jáne 50 aǵylshyn tili muǵalimine jobalyq oqytý negizindegi kásibı damý trenıngin ótkizgen. Mamyr men maýsym aılarynda 100 muǵalim onlaın oqýdan ótip, 8-26 shilde aralyǵynda Nazarbaev ýnıversıtetindegi trenıngke qatysqan.
Muǵalimderdi daıarlaý boıynsha Boll Steıt zertteý ýnıversıtetiniń úsh aptalyq baǵdarlamasyn Qazaqstandaǵy AQSh elshiligi qarjylandyrǵan. Elshiliktegi mádenıet boıynsha attashe Enn Perrellıdiń aıtýynsha, jobanyń basty maqsaty – Qazaqstandaǵy úsh tilde bilim berýdi jetildirý jáne oqý-ádistemelik materıaldardy kóbeıtý.
«AQSh elshiligi Qazaqstan ustazdarynyń aǵylshyn tilin bilý deńgeıin kóteretin bul jobaǵa qýana-qýana qoldaý bildiredi. Úshtildilik – órshil bastama, sondyqtan oǵan qoldaý bildirýdi uıǵardyq. Búgingi joba óte qyzyqty, sebebi onda túrli tásilder, STEM (Science, technology, engineering, and mathematics) baǵytyndaǵy tehnologııalar qoldanylady. Trenıngke qatysqan muǵalimderdiń kópshiligi orta mektepte sabaq beredi, bastaýysh synyp muǵalimderi de bar. Bizdiń oıymyzsha, bul úlken jumys, STEM oqytýshylarynyń basym bóligi aǵylshyn tilin bilý mindetti emes dep oılaıdy. Biraq, aǵylshyn tilin bilý arqyly álem boıynsha eń úzdik resýrstarǵa qol jetkizedi. Túrli baǵdarlamalarǵa qatysa alady. Joba bıyl alǵash ret uıymdastyryldy. Kelesi jyly da óz jalǵasyn tabady dep úmittenemiz», - dedi Qazaqstandaǵy AQSh Elshiligi mádenıet boıynsha attashe Enn Perrellı.
Sonymen birge, jobaǵa Nazarbaev ýnıversıtetiniń úzdiksiz bilim berý departamentiniń aǵylshyn tili oqytýshylary da shaqyrylǵan. Birlesken joba nátıjesinde pán muǵalimderine qajetti oqytýǵa arnalǵan resýrstar ázirlendi.
«Óz qalamyzdyń muǵalimdermen birigip, barlyq óńirdegi ustazdarǵa paıdaly bolatyn materıal ázirledik. Bul materıaldar elektrondy túrde barshaǵa qoljetimdi.Ázirge munda 5-synypqa arnalǵan ınformatıka pániniń materıaldary toptastyrylǵan. Munda pán muǵalimi barlyq taqyrypty izdep taba alady. Termınologııa bóliminde aǵylshyn tilindegi termınder, sózdik vıdeosy bar, túrli jattyǵýlar men qorytyndy testileý engizilgen», - dedi temirtaýlyq muǵalim Tatıana Kon.
Onyń aıtýynsha, balalar men muǵalimder bul jobany ınternetsiz de qaraı alady.
«Sondaı-aq, bul sabaqqa kele almaı qalǵan balalar úshin tıimdi bolmaq. Muǵalimder elektrondy jobany balaǵa jibere alady. Bul ázirge jobanyń jospary ǵana. Qazir materıaldar jınaqtap, tájirıbeden ótkizip, muǵalimderdiń pikirin tyńdaımyz. Eger jobany paıdaly dep tapsa, ózge synyptarmen jáne ózge pándermen de jumys isteımiz», - dedi muǵalim.
Pavlodar qalasynan kelgen Úmit Túktibaeva, Áıgerim Hamıtova, Merýert Bilálova jáne Amanjol Tańat tildik kedergilerdi joıyp, aǵylshyn tilin úırený qabiletin damytatyn veb-resýrs qurǵan.
«Bastapqyda biz bıologııa, kompıýterlik tehnologııalar jáne aǵylshyn tili pánderi boıynsha veb-resýrs jasaımyz. Osylaısha, muǵalimder men oqýshylarǵa tildik kedergilerden arylýǵa, aǵylshyn tilinde erkin sóıleýine kómektesemiz», - dedi muǵalimder.
2019 jyldyń qarasha aıynda qatysýshylar atalǵan trenıngke qatysqanyn rastaıtyn Ball State University resmı hatyn alady. Odan keıin muǵalimder komandalary óz óńirlerinde jobalaryn jetildirip, ózge áriptesterine tanystyrady.
