Qazaqstannyń 10-ǵa jýyq telearnasy kabeldik toptamaǵa engizilmek
ASTANA. 25 qazan. QazAqparat - 6 qarasha kúni konkýrs nátıjesi boıynsha kabeldik, efırlik jáne spýtnıktik jelilerge engizilýi mindetti áleýmettik mańyzy bar telearnalardyń tizimi belgili bolady. Bul týraly búgin Astanada «Teleradıotaratý týraly» zań jobasy talqylanǵan dóńgelek ústel barysynda QR Mádenıet jáne aqparat vıtse-mınıstri Arman Qyryqbaev málim etti.
«Búgingi kúni tek eki telearna Qazaqstannyń 95 paıyz aımaǵyn efırlik jelimen qamtyǵan. Olar: «Habar» men «Qazaqstan» telearnalary. Qalǵan telearnalar 50 paıyz deńgeıinde. Osyǵan oraı, zań jobasy azamattardyń otandyq telearnalarǵa qoljetimdiligin arttyrýdy kózdeıdi. Ol úshin kabeldik, efırlik jáne spýtnıktik jelilerge engizilýi mindetti áleýmettik mańyzy bar telearnalardyń tizimi jasalady», - dedi vıtse-mınıstr.
Onyń aıtýynsha, kabeldik, efırlik jáne spýtnıktik jelilerge engiziletin telearnalardyń sany, aldyn ala boljam boıynsha, shamamen 10-ǵa tarta bolmaq.
«Eshkimge de basymdyq berilmeıdi. Kabel arqyly mindetti túrde taratylatyn telearnalardyń tizimi kórsetilgen krıterıılerge saı qatań Zań boıynsha qurylady. Zań boıynsha barlyǵynyń da qatysýǵa quqyǵy bar. Alaıda belgilengen talaptar bar, sonyń ishinde til tepe-teńdigi zańnamasyn ustaný jatady», - dep atap ótti ol.
Qazir Qazaqstannyń medıa keńistiginde 52 telearna aqparat taratyp, 150 kabeldik operator qalyń kórermenge qyzmet kórsetýde. Joǵaryda atalǵan telearnalardyń tek 12-i ǵana, respýblıka aýmaǵyna aqparat taratsa, júzdiń ústindegi kabeldik telebaılanys operatorlary, negizinen sheteldik medıaquraldardyń dúnıesin nazarǵa usynyp otyr. Nátıjesinde, el medıakeńistiginiń aýqymdy bóligi solardyń enshisinde. Atalmysh zań jobasy aıasynda kabeldik toptamaǵa otandyq arnalar qosylsa, tarazy basy teńesip, qazaqstandyq kontenttiń damýyna serpin beredi.
