Qazaqstannyń JI-degi tájirıbesi óńirde suranysqa ıe bolady — Ázerbaıjan sarapshysy
ASTANA. KAZINFORM — Memleket basshysy bekitken orta bilim berý júıesine jasandy ıntellektti engizý týraly jarlyq eldiń bilim berý saıasatyn damytýdyń jańa kezeńin ashyp, postkeńestik keńistik úshin úlgi bola alady. Mundaı pikirdi Kazinform agenttiginiń tilshisine Ázerbaıjannyń «Ońtústik Kavkaz» saıasattanýshylar klýbynyń jetekshisi Ilgar Velızade bildirdi.
Onyń aıtýynsha, másele qarqyndy tehnologııalyq damýǵa baılanysty oqytý men kadr daıarlaý tásilderin túbegeıli ózgertý týraly bolyp otyr.
— Bul revolıýtsııalyq sheshim, sebebi bilim berý tásilderi túbegeıli ózgerip jatyr. Alǵash ret bilim berý júıesine, ásirese postkeńestik keńistikte, jasandy ıntellekt tehnologııasy engizilip otyr, — dedi Ilgar Velızade.
Sarapshynyń aıtýynsha, Tsıfrlyq Qazaqstan tujyrymdamasy aıasynda bilim berý strategııalyq mańyzǵa ıe, al JI adam kapıtalyn daıarlaýdyń zamanaýı modelin qalyptastyrýda negizgi ról atqarady.
Sonymen qatar ol mundaı aýqymdy ózgeristerdiń belgili bir qıyndyqtarmen qatar júretinin de atap ótti.
— Kez kelgen jańashyldyq táýekeldermen baılanysty. Kez kelgen alǵashqy qadam jasaýshy belgisizdikpen betpe-bet keledi. Búginde Qazaqstan postkeńestik elder úshin osyndaı alǵashqy qadam jasaýshy retinde kórinip otyr, — dedi saıasattanýshy.
Sonymen qatar ol óz sózinde, jobanyń sátti júzege asýy óńirdegi basqa memleketterge, sonyń ishinde Ortalyq Azııa elderi men túrki álemine úlgi bola alady.
— Qazaqstannyń tájirıbesi barlyq postkeńestik elder úshin, ásirese Ázerbaıjan úshin de mańyzdy. Bul eksperımenttiń sáttiligi basqa memleketterde de osyndaı tájirıbelerdi iske asyrýǵa jol ashady, — dedi Velızade.
Sarapshy sondaı-aq Qazaqstan tájirıbesin keńeıtý eldiń óńirde ınnovatsııalyq ıdeıalar men zamanaýı bilim berý sheshimderin qalyptastyratyn ortalyqtardyń biri retinde pozıtsııasyn kúsheıtýi múmkin ekenin atap ótti.
Aıta keteıik, elimizde 700-den astam bilim berý baǵdarlamasy qysqartylyp, jańa basym baǵyttar engiziledi.
