Qazaqstannyń jeti óńirinde mádenı ınfraqurylym qarqyndy damyp keledi
ASTANA. KAZINFORM – QR Mádenıet jáne aqparat mınıstrliginde 2026 jyldyń birinshi jartyjyldyǵynda Almaty, Shymkent qalalary men Shyǵys Qazaqstan, Qaraǵandy, Qyzylorda, Túrkistan jáne Abaı oblystarynda mádenıet salasynda atqarylǵan jumystardyń qorytyndysy qaraldy.
Jıynda óńirlerdegi mádenı ınfraqurylymdy damytý, tsıfrlyq jobalardy iske asyrý, halyqaralyq festıvalderdi uıymdastyrý jáne tarıhı-mádenı murany saqtaý baǵytyndaǵy jumystar talqylandy.
Shyǵys Qazaqstan oblysynda ótken «Altaı – túrki áleminiń altyn besigi» halyqaralyq festıvaline 10 el men óńirdiń ókilderi qatysyp, ony 50 myńnan astam kórermen tamashalady. Óńir mýzeılerine 328,4 myń adam baryp, 5,5 myńnan astam ekskýrsııa ótkizildi. Qazirgi ýaqytta Shyǵys Qazaqstan óner mýzeıine kúrdeli jóndeý júrgizilip, «Berel» mýzeı-qoryǵynyń vızıt-ortalyǵynyń jobasy ázirlenip jatyr.
Almatyda mádenı is-sharalar qalanyń barlyq aýdanynda uıymdastyrylyp keledi. IV Almaty Circus Festival festıvaline 18 eldiń ónerpazdary qatysyp, 10 myń kórermen jınaldy. Qalanyń jeti kitaphana fılıaly táýlik boıy jumys isteıdi, al «Almaty kitaphanalary» mobıldi qosymshasyn 27 myńnan astam adam paıdalanady. Qala kúnine arnalǵan shyǵarmashylyq baıqaýlardyń biryńǵaı toptamasy ázirlendi.
Abaı oblysynda Joǵarǵy Eginsý jáne Kókjyra aýyldarynda 100 oryndyq eki aýyldyq klýb ashyldy. Sonymen qatar Besqaraǵaı aýdanynda taǵy úsh mádenıet nysanynyń qurylysy júrip jatyr. Jana Klub jobasy aıasynda 109 myńnan astam turǵynǵa qyzmet kórsetetin 15 aýyl kitaphanasy jańǵyrtylýda.
Qaraǵandy oblysynda «Oqıtyn ult» jobasy 67,8 myń adamdy qamtyp, pılottyq óńirler arasyndaǵy úzdik nátıjeni kórsetti. Alǵash ret uıymdastyrylǵan «BaiQymyz Qarqaraly – 2026» etno-gastrofestıvaline 20 myńnan astam adam qatysty. Kókpekti aýylynda jańa klýb ashylyp, qalalyq arhıv ǵımaraty qaıta jańǵyrtyldy. Nura aýdanynda Óner úıiniń qurylysy jalǵasyp jatyr.
Qyzylorda oblysynda jańa drama teatrynyń qurylysyn bastaýǵa daıyndyq júrgizilýde. Alǵashqy Nartai Theatre Fest festıvaline 4 myńǵa jýyq kórermen jınaldy. Sondaı-aq óńirde 600 myń saqtaý birligine arnalǵan táýlik boıy jumys isteıtin Prezıdenttik kitaphana jobasy júzege asyrylyp jatyr. Smart Archive tsıfrlyq platformasy Arhıvshilerdiń halyqaralyq kongresinde tanystyryldy.
Túrkistan oblysynda bıyl 11 mádenıet úıin paıdalanýǵa berý josparlanǵan. Onyń ekeýi ashylyp, taǵy úsheýi paıdalanýǵa daıyn. Óńirde 17 myńnan astam bala shyǵarmashylyq úıirmelerge tegin qatysady. Úsh kásibı teatr jyl basynan beri 186 spektakl qoıyp, oblys aýdandary men elimizdiń ózge óńirlerinde gastroldik saparmen óner kórsetti. Sonymen qatar «ULYLARDYN OTANY» halyqaralyq sımpozıýmyna jeti elden kelgen 26 sýretshi qatysty.
Shymkentte jeti qalalyq teatr 16 jańa spektakl usynyp, olardy 124 myńnan astam kórermen tamashalady. Qalalyq opera jáne balet teatrynyń solısteri Sıan men Nagasakıde ótken halyqaralyq baıqaýlarda júldege ıe boldy. Jastar teatry Aljırdegi halyqaralyq festıvalde «Antıgona» spektaklin sahnalady. Qalada jańa opera jáne balet teatrynyń jobasy ázirlenip, Mádenıet jáne óner ýnıversıtetin ashý baǵytyndaǵy jumystar júrgizilýde. Sonymen qatar Tekesý turǵyn alabynda jańa mádenıet úıi paıdalanýǵa berilip, taǵy 11 mádenıet nysanyn jóndeý jobasy daıyndalýda.
Otyrys barysynda teatrlardyń elektrondyq esep berý júıesin engizý, repertýardaǵy qazaqstandyq avtorlardyń shyǵarmalaryn kóbeıtý, ǵylymı restavratsııa mamandaryn daıarlaý, tarıhı-mádenı murany saqtaý jáne mádenı týrızmdi damytý máseleleri qaraldy. Óńirlerge mádenı nysandardy keńinen nasıhattap, týrısterge arnalǵan baǵyt-baǵdar júıesin jetildirý tapsyryldy.
Jyldyń ekinshi jartysynda «Shyǵys salburyny – 2026» halyqaralyq búrkitshiler týrnıri, «Aıaz Ata, Aqshaqar – 2026» festıvali, Almaty Puppet Festival, «Kók-Tóbe Opera» festıvali, Voice of Turan halyqaralyq baıqaýy jáne teatr, mýzyka men kórme baǵytyndaǵy birqatar joba ótkizý josparlanyp otyr.
Jıyn qorytyndysy boıynsha óńirlerge Memleket basshysynyń, Qazaqstan Respýblıkasy Úkimetiniń jáne Mádenıet jáne aqparat mınıstrliginiń tapsyrmalaryn ýaqytyly oryndaý, josparlanǵan jobalardy tolyq aıaqtaý jáne kóterilgen máseleler boıynsha tıisti sharalar qabyldaý tapsyryldy.
Aıta keteıik, elimizde tamyz aıynda bes iri festıval ótedi.
