Qazaqstannyń jeńil ónerkásibinde 18 myńnan astam adam eńbek etedi
ASTANA. KAZINFORM – Jyl saıyn maýsym aıynyń ekinshi jeksenbisinde elimizde Jeńil ónerkásip qyzmetkerleri kúni atalyp ótedi.
Bul kásibı mereke — otandyq óndiristiń damýyna, ishki naryqty sapaly ónimmen qamtamasyz etýge jáne eldiń ónerkásiptik áleýetin nyǵaıtýǵa úles qosyp júrgen sala mamandaryna kórsetilgen qurmettiń belgisi. Búginde bul salada myńdaǵan maman eńbek etedi. Olardyń kúndelikti eńbegi óndiristi jańǵyrtýǵa, jańa baǵyttardy damytýǵa jáne qazaqstandyq ónimniń básekege qabilettiligin arttyrýǵa jol ashyp otyr.
Jeńil ónerkásip áleýmettik mańyzy joǵary salalardyń biri jáne sońǵy bes jyl boıy turaqty ósim kórsetip keledi.
— 2025 jyldyń qorytyndysy boıynsha jeńil ónerkásip ónimderiniń kólemi 2024 jylmen salystyrǵanda 22,6%-ǵa artyp, 259,5 mlrd teńge boldy. Ósimniń negizgi úlesi óndiris kólemi 159 mlrd teńgege jetken toqyma ónerkásibine tıesili boldy.
Bul sala óńdeýshi ónerkásiptegi eń qarqyndy damyp kele jatqan baǵyttardyń biri bolyp qala beredi. 2026 jylǵy qańtar-sáýir aılarynyń qorytyndysy boıynsha óndiris kólemi 77,1 mlrd teńgege jetip, naqty kólem ındeksi 225,2%-dy qurady.
Eń joǵary ósim toqyma óndirisinde tirkeldi. Bul baǵyttaǵy óndiris kólemi 46 mlrd teńgege jetip, naqty kólem ındeksi 296%-dy qurady. Kıim óndirisiniń kólemi 25,2 mlrd teńgege (NKI — 135,8%), bylǵary jáne oǵan qatysty ónimder óndirisi 5,8 mlrd teńgege (NKI — 142%) jetti, — delingen mınıstrlik habarlamasynda.
Búginde jeńil ónerkásip salasynda 18 myńnan asa adamdy jumyspen qamtyp otyrǵan 1,4 myńnan astam kásiporyn jumys isteıdi. Sala qurylymynda kıim óndiretin kásiporyndar basym, olardyń úlesine jumys istep turǵan kompanııalardyń jartysynan astamy tıesili.
Salany odan ári óristetý maqsatynda Ónerkásip jáne qurylys mınıstrligi 2026-2030 jyldarǵa arnalǵan jeńil ónerkásipti damytý jónindegi keshendi jospardy bekitý baǵytynda jumys júrgizýde.
Qujat otandyq óndirýshilerdi qoldaýdyń jańa tetikterin engizýdi kózdeıdi. Atap aıtqanda, jergilikti qamtý úlesin arttyrý jónindegi mindettemelerdi memlekettik qoldaý sharalarymen ushtastyratyn lokalızatsııa deńgeıin kóterý týraly kelisimder tetigin engizý josparlanyp otyr.
Sonymen qatar tsıfrlyq baqylaýdy kúsheıte otyryp, korporatıvtik tabys salyǵy men qosylǵan qun salyǵy boıynsha nóldik mólsherlemelerdi qoldanýdy qamtıtyn salyqtyq yntalandyrý sharalary pysyqtalýda.
Negizgi basymdyqtardyń biri — toqyma óndirisin damytý. Elde maqta-toqyma klasterin qurý jónindegi jol kartasy iske asyrylyp jatyr. Sonymen qatar ınvestıtsııa tartý jáne shıkizatty tereń óńdeý baǵytyndaǵy jumystar jalǵasýda.
2023 jyldan beri «Ónerkásipti damytý qory» AQ-nyń jeńildetilgen qarjylandyrý tetikteri arqyly jeńil ónerkásip salasyndaǵy jalpy quny 10,2 mlrd teńge bolatyn alty joba maquldanyp, qarjylandyryldy.
Naryqtyń ashyqtyǵyn arttyrý jumystary da jalǵasýda. Elde jeńil ónerkásip taýarlaryn tańbalaý jáne qadaǵalaý júıeleri engizilip jatyr. Bul kóleńkeli aınalym úlesin azaıtyp, adal básekelestik ortasyn qalyptastyrýǵa múmkindik beredi.
Investorlardy tartý maqsatynda sala kásiporyndary arnaıy ekonomıkalyq aımaqtar usynatyn jeńildikterdi paıdalana alady. Jeńil ónerkásip elimizdegi 10 arnaıy ekonomıkalyq aımaqtyń basym baǵyttar tizbesine engizilgen. Bul bızneske daıyn ınfraqurylymǵa, salyqtyq jeńildikterge jáne memlekettik qoldaý sharalaryna qol jetkizýge múmkindik beredi.
Salanyń damýyna ınvestıtsııalyq jobalar da eleýli úles qosyp keledi. 2025 jyly Indýstrııalandyrýdyń biryńǵaı kartasy aıasynda 520-dan astam jumys ornyn ashýǵa múmkiendik bergen toǵyz joba iske qosyldy.
Іri jobalardyń biri — «Túrkistan tekstıl» JShS-men maqta óńdeý ónerkásibiniń tolyq óndiristik tsıklin qamtıtyn keshendi jobany iske asyrý jónindegi ınvestıtsııalyq kelisimge qol qoıý boldy. Bul joba zamanaýı óndiristik tizbekter qalyptastyrýǵa jáne qosylǵan quny joǵary ónim kólemin arttyrýǵa baǵyttalǵan.
2026 jyldyń sońyna deıin salada taǵy 9 ınvestıtsııalyq jobany iske asyrý josparlanyp otyr. Bul qosymsha jańa jumys oryndaryn ashýǵa jáne eldiń ónerkásiptik áleýetin odan ári nyǵaıtýǵa múmkindik beredi.
Aıta ketelik Astanadaǵy ónerkásip óndirisiniń kólemi 1,3 trln teńgege jetti.
