Qazaqstannyń Jenevadaǵy BUU bólimshesindegi Turaqty ókili qyzmetine kiristi
JENEVA. KAZINFORM — Qazaqstan Respýblıkasynyń Jenevadaǵy BUU bólimshesi men basqa da halyqaralyq uıymdar janyndaǵy Turaqty ókili Erjan Qazyhan BUU bólimshesiniń Bas dırektory Tatıana Valovaıaǵa óz ýákilettiligin tabys etip, mindetterin resmı túrde atqarýǵa kiristi. Bul týraly SІM málim etti.
— Áńgimelesý barysynda Elshi E.Qazyhan T.Valovaıaǵa QR Prezıdenti Qasym-Jomart Toqaevtyń iltıpatyn jetkizip, Qazaqstannyń Jenevadaǵy BUU bólimshesiniń jumysyn odan ári qoldaıtynyn qýattady. T.Valovaıa óz kezeginde Qazaqstannyń BUU aıasyndaǵy belsendi jumysyn quptap, Turaqty ókildi Bólimshe qyzmetiniń negizgi baǵyttarymen tanystyrdy, — delingen habarlamada.
Sonymen qatar, taraptar birlesken jobalar men kópjaqty is-sharalardy uıymdastyrý máselelerin, BUU-nyń Jeneva alańynda Qazaqstannyń iri halyqaralyq bastamalaryn odan ári ilgeriletý perspektıvalaryn talqylady. Almatydaǵy BUU-nyń Ortalyq Azııa men Aýǵanstan úshin Ornyqty damý maqsattary jónindegi óńirlik ortalyǵynyń jumysy men kelesi jyly Astanada ótetin Óńirlik ekologııalyq sammıtke erekshe nazar aýdaryldy.
Eske sala keteıik, buǵan deıin Memleket basshysynyń Jarlyǵymen Erjan Qazyhan Jeneva qalasyndaǵy (Shveıtsarııa) Birikken Ulttar Uıymynyń bólimshesi men basqa da halyqaralyq uıymdar janyndaǵy Qazaqstan Respýblıkasynyń Turaqty ókili laýazymyna taǵaıyndalǵanyn jazǵan edik.