Qazaqstannyń jelden 900 GVt energııa óndirýge áleýeti bar – EQQDB ókili
ASTANA. KAZINFORM – Qazaqstannyń jelden 900 GVvt energııa óndirýge áleýeti bar. Bul týraly Óńirlik ekologııalyq forýmnyń taqyryptyq sessııasynda Eýropalyq qaıta qurý jáne damý bankiniń Ortalyq Azııa jáne Mońǵolııa boıynsha basqarýshy dırektory Hýseın Ozhan aıtty.
— Sózimdi qazaqtyń «jalǵyzdyń úni shyqpas, jaıaýdyń shańy shyqpas» degen maqalymen bastaýǵa ruqsat etińizder. Búkil álemde energııa qaýipsizdigi túsinigi túbegeıli ózgerip jatyr. Geosaıası belgisizdik ekonomıkalyq qubylmalylyqpen jáne saýda aǵyndarynyń buzylýymen ushtasyp, energııa tıimdiliginiń, óńirlik yntymaqtastyq qajettiligi men taza energııaǵa kóshý úderisin jedeldetý mańyzdylyǵyn arttyra túsýde. Klımattyq qysymdar, sonyń ishinde sý tapshylyǵy, qorshaǵan ortanyń lastanýy jáne suranystyń qarqyndy ósýi qazba otynǵa táýeldi bytyrańqy júıeniń endigi ýaqytta jetkiliksiz ekenin aıqyn kórsetip otyr, - dedi eýropalyq bank ókili.
Osy oraıda ol jańartylatyn energııa óndirýde Ortalyq Azııa óńiriniń áleýeti orasan ekenin atap ótti.
— Tek Qazaqstannyń ózinde tehnıkalyq turǵydan paıdalanýǵa bolatyn 900 GVt-tan astam jel energııasy áleýeti bar. Ózbekstanda jańartylatyn energııany qazirgi tutynýdan tórt ese kóp óndirýge bolady. Al Qyrǵyzstan sý energetıka salasynda úlken múmkindikterge ıe. Biz taza energııanyń túrli kózderin paıdalanyp, osy áleýetti óńirlik turaqtylyqqa aınaldyrýymyz kerek, - dedi Hýseın Ozhan.
Ótken jylǵy málimetke sáıkes, jel elektr stantsııalary (JES) JEK nysandarynyń jalpy qýatynda eń úlken úlesti alady — shamamen 3 GVt ishinen 1,5 GVt astamy jel energetıkasyna tıesili.
