Qazaqstannyń jazǵy kýrorttarynda demalý qansha turady

ASTANA. KAZINFORM – Demalys kezinde qonaqúılerdi aldyn ala qalaı brondap, daıyn joldama boıynsha qaıda barýǵa bolady? Osy oraıda kópshilik nazaryna qajet málimetterdi usynýdy jón kórdik.

Balqash kýrorty aımaǵy

Elıtaly nómirlerde turý baǵasy bir adamǵa táýligine 50 000 teńgeden, eki adamǵa 65 000 teńgeden bastalady. Degenmen, demalys bazalarynda toqtaǵan tıimdirek bolady. Maýsym aıynyń basynda bul jerlerde 6 orynǵa arnalǵan bólmeni 16 000 teńgege, al shildede 40 000 teńgege alý múmkindigi bar.

Ortasha baǵa sanatyndaǵy eki oryndy nómirler maýsym aıynda 10 000 teńgeden bastalyp, shildede eki ese qymbatqa túsedi.

Sonymen qatar, operatorlar óte tıimdi daıyn týrlardy usynyp otyr. Eki kúnge tamaqsyz 27500 teńgege nemese tamaqpen birge 35500 teńgege barýǵa bolady. Úsh kúnge arnalǵan osyndaı týrlar sáıkesinshe 35 000 teńge jáne 51 000 teńge turady.

Bul rette demalys kúnderin týroperatorlar usynǵannan arzanyraq josparlaý óte qıyn. Sondyqtan 50 000 teńge - bul úsh kúndik demalysty uıymdastyrýǵa bolatyn eń tómengi soma.

Alakól kýrorty aımaǵy

Bul aýmaqta qonaqtardy ornalastyrý baǵasy úsh mezgil tamaqpen kúnine 10 000 teńgeden bastalady. Qonaqúıdegi jaıly nómirler sanatyna jáne merzimine baılanysty táýligine 39 000 teńgeden 94 000 teńgege deıin bolýy múmkin.

Týrıster arasynda suranysy az kezeńde (maýsym aıynyń basy) demalys bazasyndaǵy oryndar ortasha eseppen 10 000 teńge boldy. Biraq 15 shildeden 15 tamyzǵa deıin olar kúnine shamamen 19 000 teńgege deıin jetedi. Demalys bazalarynyń basty artyqshylyǵy – bul baǵaǵa kúnine úsh mezgil tamaqtaný kiredi.

Eger shaǵyn kottedjdi tańdasańyz (eki adamǵa), onda ol maýsym aıynda 45 000 teńgege, al shildede 80 000 teńgege deıin jetýi múmkin.

Qonaq úı nómirleri eki adamǵa 39 000 teńgeden, al tórt orynǵa 68 000 teńge shamasynda baǵalanyp otyr. Shilde-tamyz aılarynda bul baǵa shamamen eki ese ósedi.

Atap aıtqanda, jol shyǵynyn da eskerý kerek. Máselen, Almatydan avtobýs bıleti 21-25 myń teńge turady.

Ornalasqan jerińizge qaraı jáne tamaqqa qansha aqsha jumsaıtynyńyzǵa baılanysty munda úsh kúndik demalys bir adamǵa shamamen 120-150 myń teńge aralyǵynda bolady.

Býrabaı kýrorty aımaǵy

Shaǵyn bólmeli úı úshin tómengi baǵa shegi kúnine 12 000 - 20 000 teńge somasynda belgilenýi múmkin. Qonaqúılerde osy tektes shaǵyn bólmeler sál arzanyraq taba alasyz. Shıpajaıǵa joldama quny kúnine shamamen 18-20 myń teńgeden bastalady.

Eger premıým segmenti týraly aıtatyn bolsaq, onda jaz kezinde bólmeler 110 000 teńgege, al osyǵan sáıkes servıstegi úıler 90 000 teńgege jetedi.

Osy kýrortta úsh kúndik demalysqa adam basyna keminde 150-200 myń teńge daıyndaý kerek.

Mańǵystaý kýrort aımaǵy

Jergilikti hostelderde baǵa 2-4 myń teńgeden bastalady, al týrıster aǵylatyn kezeńde eki ese ósedi. Aqtaýda táýligine páterdi 8-14 myń teńge aralyǵynda alýǵa bolady. Al jaǵalaýǵa jaqyn úıler qymbattyraq.

Demalys bazasyndaǵy bir kisilik nómirler qazir 12 000 teńgege berilip jatsa, shilde aıynda 20 000 teńgege deıin jetedi. Eki orynǵa arnalǵan bólmeler – 30 000 teńgeden, úlken úıler - 50 000 teńgeden.

Qonaqúı nómiriniń quny jaılylyq deńgeıine qaraı aıtarlyqtaı erekshelenedi. Bir bólmeniń ortasha quny 20 000 - 30 000 teńge shamasynda.

Aıta keteıik, ashanada 3000 teńgege tamaq ishýge bolady, al meıramhanada bir adamǵa shaqqandaǵy ortasha esepshot - 20 000 teńge.

Jalpy, jol sapary - úlken máseleniń biri. Mysaly, Astanadan keletin poıyzdyń bıleti 20 000 teńge, al Almatydan eki esege jýyq qymbat – 35 000 teńge turady. Aldyn ala bılet alsańyz, bul aqshaǵa ushaqpen jetýge bolady. Eger bılet máselesin erterek qolǵa almasańyz, onda mundaı reıs 150 000 teńgege deıin jetýi múmkin.

Endeshe, baspana men jolaqyǵa, tamaqtanýǵa qatysty ortasha baǵany alsaq, bir adamǵa úsh kúndik demalys 150 000 teńgeden bastalady.

Almaty taý klasteri

Taýdaǵy shaǵyn kottedjder 70 000 teńgege baǵalanady, al bir top bolyp barǵandarǵa 140 000 teńgeden jalǵa beriledi. Biraq aldyn ala brondasańyz, 30% arzanyraq taba alasyz. Degenmen, aqsha únemdeý úshin Almatydaǵy qonaqúılerge toqtaýǵa bolady.

Munda hosteldegi nómir kúnine 3-7 myń teńge turady. Medeý men Shymbulaqqa shaǵyn avtobýspen jetýge bolady (taksımen bir jaqqa 2-3 myń teńge). Qaladan tikeleı Úlken Almaty kóline ekskýrsııalar 10-15 myń teńge turady.

Jeńil-jelpi tamaqtanýǵa bir adamǵa shamamen 5000 teńge jumsalady, al tolyqqandy túski tamaq eki ese qymbatqa túsedi. Bul rette, bir top adamǵa birden tapsyrys berseńizder, aqsha únemdeýdiń jaqsy tásili.

Jalpy alǵanda, qymbatqa túsetin jol shyǵyny men tamaqtanýdy, sondaı-aq baspana qunyn eskere otyryp, Almaty taýlarynda 200 000 teńgege emin-erkin demalýǵa bolady. Bul turǵyda jergilikti turǵyndar úshin taýdaǵy demalys eki ese arzanǵa túsedi.

Budan buryn habarlanǵandaı, jaqynda Týrızm jáne sport mınıstrligi týrısterdiń taýly aımaqtardaǵy qaýipsizdigin qamtamasyz etý úshin TJM bólimshelerine óz marshrýttary týraly mindetti túrde habarlaý normasy týraly aıtqan edi. 

Eske salsaq, shildeden bastap «Astana-Býrabaı» baǵytynda jańa elektr poıyzy qatynaıdy.