Qazaqstannyń jasóspirimder quramasyn kimder jattyqtyrady
ASTANA.KAZINFORM — Qazaqstan fýtbol federatsııasynyń Tehnıkalyq damý komıtetiniń otyrysynda Qazaqstan jasóspirimder quramasynyń jattyqtyrýshylar shtabynyń aldaǵy jumysyna qatysty kadrlyq jáne uıymdastyrýshylyq máseleler qaraldy.
QFF málimetinshe, Qazaqstan jasóspirimder quramasynyń aǵa jattyqtyrýshysy mindetin ýaqytsha atqaratyn mamandardy tańdaý kezinde Komıtet músheleri ulttyq quramaǵa úmitker fýtbolshylardyń klýbtyq tıesiligin de eskergen.
Daýys berý qorytyndysy boıynsha Esimbek Nurahmetov 2011 jyly týǵan oıynshylardan quralǵan Qazaqstan quramasynyń aǵa jattyqtyrýshysy mindetin atqarýshy, al Jaǵyppar Anýar 2012 jyly týǵan fýtbolshylar quramasynyń aǵa jattyqtyrýshysy mindetin atqarýshy bolyp taǵaıyndaldy.
Eki jasóspirimder quramasynyń jattyqtyrýshylar shtabyna assıstentter men tálimger retinde mol praktıkalyq tájirıbesi bar mamandar mindetti túrde engiziledi.
Bul komandalardy alda eki halyqaralyq týrnır kútip tur. 2012 jyly týǵan Qazaqstan quramasy 2026 jylǵy 14-19 qyrkúıek aralyǵynda Serbııada ótetin ÝEFA Damý týrnırine qatysady. Jas fýtbolshylar atalǵan jarysta Túrkııa, Reseı jáne Serbııa quramalarymen kezdesedi.
Al Qazaqstannyń U-16 quramasy (2011 jyly týǵan oıynshylar) 2026 jylǵy 7-11 qazan aralyǵynda Grýzııanyń Batýmı qalasynda ótetin halyqaralyq týrnırde óner kórsetedi.
Qazaqstannyń U-15 jáne U-16 jasóspirimder quramalarynyń aǵa jattyqtyrýshylaryna qatysty túpkilikti sheshim 2027 jyldyń basynda qabyldanady. Bul rette komandalardyń nátıjeleri, oıyn sapasy jáne fýtbolshylardyń damý deńgeıi eskeriledi.
Aıta keteıik, «Barselona» kóz tikken Kárim Meńdiqanov Qazaqstan jastar quramasyna shaqyrtý alǵan bolatyn.
