Qazaqstannyń jasóspirim hokkeıshi qyzdary Latvııaǵa ese jiberdi

ASTANA. KAZINFORM - Shaıbaly hokkeıden jasóspirim qyzdar arasynda álem chempıonatynyń ІІA dıvızıonynda synǵa túsip jatqan Qazaqstan quramasy úshinshi kezdesýinde Latvııadan jeńilip qaldy.

Álem chempıonaty Nıderlandtyń Herenven qalasynda ótip jatyr. Jarys 21 qańtarǵa deıin jalǵasady.

Týrnır aıasynda Qazaqstan quramasy Ulybrıtanııa, Túrkııa, Qytaı, Latvııa jáne Nıderlandymen sheberlik baıqasady.

Úshinshi kezdesýinde qazaqstandyq hokkeıshiler Latvııaǵa 1:2 esebimen ese jiberdi.

Qazaqstandyq hokkeıshiler qazirge deıin Ulybrıtanııadan 0:4 esebimen jeńilip, Túrkııany 6:0 esebimen tize búktirdi.

Endi qazaqstandyq hokkeıshiler 20 qańtarda Qytaımen kezdesse, 21 qańtarda Nıderlandymen muz aıdynyna shyǵady.

Eske salsaq, budan buryn shaıbaly hokkeıden Álem chempıonatynda Qazaqstan jastar quramasynyń yqtımal qarsylastary anyqtaldy.

Qazaqstan jastar quramasy V tobynda Shvetsııa, Chehııa, Slovakııa jáne Shveıtsarııa quramalarymen oınaýy múmkin.

Jastar arasyndaǵy 2025 jylǵy álem chempıonaty 2024 jylǵy 26 jeltoqsan men 2025 jyldyń 5 qańtary aralyǵynda Kanada astanasy Ottava qalasynda ótkiziledi dep josparlanyp otyr.