Qazaqstannyń jasyryn jaýharlary: týrıster eń az baratyn TOP-5 erekshe baǵyt
ASTANA. KAZINFORM – Qazaqstan tabıǵı landshafttarynyń alýan túrliligimen jáne tarıhı-mádenı eskertkishterimen saıahatshylardy tańǵaldyryp keledi.
Tanymal baǵyttarmen qatar, dástúrli týrıstik marshrýttarǵa kirmeıtin, biraq ózindik ereksheligimen daralanatyn jańa oryndarǵa qyzyǵýshylyq artyp keledi. Týrızm jáne sport mınıstrligi Qazaqstandy tyń qyrynan ashatyn 5 baǵyt týraly málimet jarııalady.
1. Tarbaǵataı taýlary (ShQO jáne Abaı oblysy)
Bul – Shyǵys Qazaqstandaǵy kóz tartar, oqshaý ornalasqan taýly aımaq. Munda petroglıfter, jaılaýlar jáne tabıǵı landshafttar saqtalǵan. Bul óńir jaıaý týrızm men etnotýrızmge qyzyǵatyndar úshin taptyrmas oryn. Óńirde kóshpeli ómir saltynyń elementteri áli de saqtalǵan.
2. Qorǵaljyn qoryǵy (Aqmola oblysy)
Qorǵaljyn qoryǵy Astanadan nebári eki saǵattyq jerde ornalasqan. Bul – álemdegi qoqıqazdar uıa salatyn eń soltústik aýmaq. Qoryq ıÝNESKO-nyń Búkilálemdik muralar tizimindegi «Saryarqa – Soltústik Qazaqstannyń dalasy men kólderi» nysanyna kirgen. Kóktem men jaz aılarynda munda qoqıqazdar ǵana emes, júzdegen sırek qus túrin kórýge bolady.
3. Mańǵystaýdyń soltústik baǵyty (Mańǵystaý oblysy)
Bul – óńirdiń áli keń tanylmaǵan, biraq erekshe tabıǵı jáne tarıhı nysandarǵa baı bóligi. Olardyń qatarynda – Jyǵylǵannyń qulaýy, Qapamsaı shatqaly, Torysh sharlary alqaby, sondaı-aq Sultan úpi men Shaqpaq-Ata jerasty meshitteri bar. Baǵyttyń negizgi ortalyǵy – týrıstik qyzmetter kesheni bar «Sartas» vızıt-ortalyǵy.
4. Ońtústik Qazaqstannyń úńgirleri men shatqaldary
Aqmeshit úńgiri (Túrkistan oblysy) – ishine kún sáýlesi túsetin alyp karst qýysy bar erekshe geologııalyq nysan.
Saıram-Sý shatqaly (Túrkistan oblysy) – Batys Tıan-Shannyń kórikti bóligi. Munda taý ózeni, panoramalyq kórinister men serýen joldary ornalasqan.
5. Túrgen shatqaly men sarqyramalary (Almaty oblysy)
Sheteldik týrıster arasynda keńinen tanymal bolmasa da, tabıǵı kórkemdigimen jáne qoljetimdiligimen erekshelenedi. Bul jer Almatydan 90 shaqyrym qashyqtyqta ornalasqan. Munda alpi shalǵyndary, arshaly ormandar, buǵy fermalary men aıý sarqyramasy sekildi birneshe sarqyramalar bar.
Aıta keteıik, keıingi úsh jylda elimizde ekotýrıster sany 40% ósti.