Qazaqstannyń jańa tólqujatynyń dızaıny ázirlenip jatyr
ASTANA. KAZINFORM – Bıyl aqpan aıynan bastap Qazaqstan Respýblıkasy azamatynyń jańa tólqujatynyń dızaınyn ázirleý jumystary bastaldy.
Memlekettik keńesshi Erlan Qarınniń aıtýynsha, jobany jasaýǵa Ulttyq banktiń jetekshi dızaınerleri men Banknot fabrıkasynyń sarapshylary tartylǵan. Qazirgi tańda qujattyń kórkemdik bezendirilýine qatysty negizgi tujyrymdamalyq tásilder qalyptastyryldy. Ázirleý barysynda halyqaralyq standarttar men qazirgi zamanǵy úrdister eskerilip otyr. Mınımalıstik stıl, vızalyq betterdegi fondyq sýretter jáne qoldan jasaýdan qorǵaıtyn jańa elementter engiziledi.
Qazaqstannyń biregeı bolmysyn, ulttyq biregeıligin, mádenı kóptúrliligin jáne eldiń kórikti nysandaryn beıneleıtin tujyrymdamalyq joba daıyndalǵan. Onyń tanystyrylymy aldaǵy ýaqytta ótedi.
Kelesi kezeńde tólqujattyń sıgnaldyq (synaq) úlgisi daıyndalmaq. Basyp shyǵarý jáne qorǵanys tehnologııalaryn engizýdiń kópsatyly úderisin eskersek, bul jumysqa birneshe aı qajet bolady.
— Qoldanystaǵy tólqujat úlgisi 17 jyldan beri paıdalanylyp keledi. Jańa dızaınnyń engizilýi jappaı aýystyrýdy qajet etpeıdi. Jańa úlgidegi qujattar burynǵy tólqujattyń jaramdylyq merzimi aıaqtalǵan kezde, búlingen jaǵdaıda nemese azamattyń qalaýy boıynsha ǵana beriledi. Rásimdeý quny ózgerissiz qalady. Búgin Banknot fabrıkasy mamandarymen birge jańa úlgidegi tólqujattyń tsıfrlyq maketi men óndiristik kezeńine qatysty tehnıkalyq máselelerdi talqyladyq, — dedi Erlan Qarın Instagram paraqshasynda.
Aıta keteıik, bıyl shilde aıynan bastap qazaqstandyqtarǵa qosymsha qorǵanys deńgeıimen jabdyqtalǵan jańa úlgidegi tólqujattar berilip jatyr.