Qazaqstannyń jańa spýtnıkteri qashan iske qosylady
ASTANA. KAZINFORM — Qazaqstannyń jańa spýtnıkteri qashan ushyrylady? Bul sauraqqa QR Jasandy ıntellekt jáne tsıfrlyq damý mınıstrligi jaýap berdi.
- Qazaqstanda jerdi qashyqtan zondtaý (JQZ) spýtnıkteriniń jańa býynyn qalyptastyrý jáne qoldanystaǵy toptamany jańartý baǵytynda júıeli jumystar júrip jatyr. Qazirgi kezde aıyrý qabileti ortasha KazEOSat-MR serııasyna jatatyn úsh spýtnıkti ázirleý jobasy iske asyrylý ústinde. Bul apparattar aýyl sharýashylyǵy, ekologııalyq monıtorıng, jer resýrstaryn basqarý jáne tótenshe jaǵdaılardy baqylaý sııaqty salalarda keń aýqymdy derekter usynýǵa baǵyttalǵan. Spýtnıkter qazirgi ýaqytta jınaqtaý jáne synaq kezeńinde, al olardyń ushyrylýy 2027 jylǵa josparlanǵan, - delingen mınıstrliktiń Kazinform agenttigine bergen jaýabynda.
Sonymen qatar, 2026–2029 jyldarǵa arnalǵan aıyrý qabileti joǵary KazEOSat-HR spýtnıkteriniń toptamasyn qurý jobasy maquldandy.
- Bul spýtnıkter joǵary dáldiktegi túsirilimder arqyly ınfraqurylymdyq josparlaý, jer kadastry, qaýipsizdik jáne qorǵanys salalaryndaǵy mindetterdi tıimdi sheshýge múmkindik beredi. Jalpy alǵanda, jańa JQZ spýtnıkterin iske qosý Qazaqstannyń ǵaryshtyq monıtorıng júıesin sapaly jańa deńgeıge kóterip, derekterdiń dáldigi men jedeldigin arttyrady, - dep atalyp ótken vedomstvo aqparatynda.
Budan buryn habarlanǵandaı, QR Jasandy ıntellekt jáne tsıfrlyq damý mınıstrligi Mońǵolııa, Nıgerııa jáne Kongoǵa spýtnıkterdi eksporttaý jumysyna túsinik berdi.
