Qazaqstannyń jańa Konstıtýtsııasy aýqymdy júıeli ózgeristerge jol ashty — sarapshy
ASTANA. KAZINFORM – Qazaqstannyń jańa Konstıtýtsııasynyń kúshine enýi reformany saıası málimdemeler kezeńinen naqty memlekettik basqarý kezeńine shyǵardy. Bul týraly Kazinform agenttiginiń Beıjińdegi menshikti tilshisine Taılandtaǵy Chýlalongkorn ýnıversıtetiniń Azııany zertteý ınstıtýtynyń ǵylymı qyzmetkeri Arıfın ıAma aıtty.
Sarapshynyń aıtýynsha, 1 shildede jańartylǵan Ata zańnyń kúshine enýi reformanyń aıaqtalǵanyn emes, aýqymdy júıeli ózgeristerdiń bastalǵanyn bildiredi. Onyń sózinshe, aldaǵy kezeń aýqymdy zańnamalyq jáne ákimshilik jumysty talap etedi.
– Konstıtýtsııalyq normalardy tolyq iske asyrý úshin qoldanystaǵy zańnamany jańa Konstıtýtsııaǵa sáıkestendirip, jańa ókildi ınstıtýttardyń tolyqqandy jumysyn qamtamasyz etý jáne qoǵamnyń reformalarǵa belsendi qatysýyn saqtaý qajet, – dedi Arıfın ıAma.
Onyń aıtýynsha, ótpeli kezeńdegi basty mindet Konstıtýtsııa mátinin ózgertý emes, memleket pen qoǵam arasyndaǵy qarym-qatynasty sapaly jańa deńgeıge kóterý. Reformanyń tabysty bolýy ony iske asyrýdyń ashyqtyǵyna, memlekettik ınstıtýttardyń eseptiligine jáne olardyń azamattar múddesine tıimdi qyzmet etý qabiletine baılanysty.
– Jańa konstıtýtsııalyq modeldiń tabysty júzege asýy Qazaqstanǵa úsh baǵytta jańa múmkindik beredi. Birinshiden, memlekettik saıasattyń júıeliligi men ashyqtyǵy qoǵamnyń senimin arttyrady. Ekinshiden, mınıstrlikter men konsýltatıvtik organdar jumysynyń ashyqtyǵyn kúsheıtip, memlekettik basqarý júıesin jetildirýge yqpal etedi. Úshinshiden, Qazaqstannyń boljamdy ári senimdi seriktes retindegi halyqaralyq bedelin nyǵaıtady, – dedi sarapshy.
Arıfın ıAma Qazaqstannyń Eýrazııanyń ortasynda ornalasýy men memlekettik ınstıtýttardy jańǵyrtýy sheteldik seriktester, sonyń ishinde Ońtústik-Shyǵys Azııa elderi úshin de mańyzdy ekenin atap ótti.
– Instıtýtsıonaldyq ortanyń anaǵurlym boljamdy bolýy Qazaqstandy saýda, bilim berý, týrızm, halal ındýstrııasy, logıstıka, ǵylymı zertteýler jáne gýmanıtarlyq baılanystar salalarynda senimdi serikteske aınaldyrady. Taıland pen ASEAN elderi úshin bul Qazaqstanmen yntymaqtastyq tek ekonomıkalyq baǵytpen shektelmeýi tıis degendi bildiredi, – dep qorytyndylady ol.
Aıta keteıik, 1 shildeden bastap Qazaqstanda jańa Konstıtýtsııa kúshine endi.
