Qazaqstannyń jańa Konstıtýtsııa jobasy álemdik BAQ-ta tarıhı sheshim retinde baǵalanyp otyr
ASTANA. KAZINFORM — Qazaqstannyń jańa Konstıtýtsııa jobasy álemdik BAQ-ta tarıhı sheshim retinde baǵalanyp otyr. Bul týraly «Referendým-2026» onlaın marafony barysynda «QazAqparat» HAA Qytaı redaktsııasynyń shef-redaktory Muqtar Murat aıtty.
— Jalpy, bir elde bolyp jatqan, ásirese Ata zańyna engiziletin ózgerister, reformalar memleket ishindegi ǵana saıası oqıǵa emes. Ol álemdik qaýymdastyq deńgeıinde de mańyzdy. Sondyqtan álemdegi jetekshi aqparat quraldary jańa Konstıtýtsııamyzdyń jobasyna qatysty kóptegen materıal jarııalap jatyr. Atalǵan materıaldarda Qazaqstanda bolyp jatqan reformalar memlekettiń uzaqmerzimdi turaqtylyǵyn saqtaý ári tıimdi memleket júıesin qurý úshin jasalyp jatqan tarıhı sheshim retinde baǵalanyp otyr. Munan bólek, Qazaqstannyń burynǵy sýperprezıdenttik modelden bas tartyp, «Kúshti Prezıdent — yqpaldy Parlament — esep beretin Úkimet» qurý ústinde degen oń pikirler basym, — dedi ol.
Sonymen qatar, ol agenttiktiń Qytaı redaktsııasy Qytaı baspasóz betterindegi Qazaqstanǵa qatysty aqparattardy muqııat baqylap otyratyndyqtaryn atap ótti.
— Qytaı qaýymdastyǵy Qazaqstanda bolyp jatqan reformalarǵa zor qyzyǵýshylyq tanytyp otyr. Resmı buqaralyq aqparat quraldarynan bólek, Qytaıdyń jeke blogerleri jáne qarapaıym áleýmettik jeli qoldanýshylary qyzý talqylap jatyr. Baıqaýymyzsha, Ata zańǵa engizilip jatqan ózgerister, Qazaqstannyń saıası júıesindegi reformalar demokratııalyq qurylymdy nyǵaıtý, mádenıetti memleketterdiń qataryna qosylýǵa umtylý jolyndaǵy Prezıdent Qasym-Jomart Toqaevtyń kóregendiligi ári batyl sheshim qabyldaýy retinde baǵalanýda, — dedi Muqtar Murat.
Buǵan deıin Májilis depýtaty Ermurat Bapı jańa Konstıtýtsııa jobasy qabyldansa, eldegi saıası partııalardyń sany artý kerek degen paıym aıtty.
Sondaı-aq, Qytaı qoǵamy Qazaqstandaǵy saıası reformalar nátıjelerine joǵary baǵa beretinin jazǵanbyz.
