Qazaqstannyń jańa ǵarysh baǵdarlamasy halyqaralyq trendterdi eskere otyryp qalyptastyrylady
ASTANA. KAZINFORM — Qazaqstannyń ǵaryshtaǵy ǵylymı zertteýler men synaqtardyń altynshy baǵdarlamasynyń jobasy qazirgi ýaqytta pysyqtalyp jatyr. Bul týraly Aeroǵarysh ónerkásibi komıtetinen málim etti.
Agenttiktiń resmı saýalyna berilgen jaýapta altynshy ǵarysh baǵdarlamasy qoldanbaly tıimdilikke basymdyq bere otyryp pysyqtalý ústinde ekeni aıtylady.
— Qazirgi ýaqytta Qazaqstannyń ǵaryshtaǵy ǵylymı zertteýler men synaqtardyń altynshy baǵdarlamasynyń jobasy múddeli uıymdardyń qatysýymen pysyqtalý ústinde. Baǵdarlama zamanaýı tehnologııalyq múmkindikterdi, halyqaralyq ǵarysh salasyndaǵy qazirgi úrdisterdi jáne qoldanbaly ǵylymı zertteýlerdi damytý basymdyqtaryn eskere otyryp qalyptastyrylyp jatyr, — dedi komıtetten.
Vedomstvonyń málimetinshe, «baǵdarlamanyń negizgi baǵyty ekonomıkaǵa qajet qoldanbaly nátıjelerge baǵdarlanǵan», al «baǵdarlamanyń túpkilikti parametrleri, onyń ishinde mazmuny men yqtımal qarjylandyrý kózderi» barlyq kelisý rásimi aıaqtalǵannan keıin belgilenedi.
Osydan buryn Baıqońyr ǵarysh aılaǵynan ushyrylǵan zymyrandardy 7,5 myńnan astam týrıst tamashalaǵanyn jazdyq.
