Qazaqstannyń jańa damý baǵdary: Prezıdent búgin Joldaýyn jarııalaıdy

– 28 qazanda túske deıin jyldaǵy dástúrge saı Qazaqstan halqyna Joldaýymdy jarııalaımyn. Qazir osy mańyzdy qujattyń mátinimen jumys istep jatyrmyn, - dep jazǵan edi Prezıdent H áleýmettik jelisinde.

Esterińizge sala ketsek, Memleket basshysy Qasym-Jomart Toqaev VI Dúnıejúzilik kóshpendiler oıyndary jeńimpazdaryn marapattaý rásiminde qazan aıynda Qazaqstan halqyna Joldaý jasap, aldaǵy josparlardy aıqyndaıtynyn aıtty. 

- Vıtse-Prezıdent taǵaıyndaldy. Jańartylǵan Úkimet jumysyna kiristi. Qaýipsizdik keńesiniń apparaty jasaqtaldy. Kóp uzamaı Qazaqstan Halyq Keńesiniń quramy bekitiledi. Quryltaıdyń kelisimimen Konstıtýtsııalyq sot sýdıalary, Ortalyq saılaý komıssııasy men Joǵary aýdıtorlyq palatanyń músheleri taǵaıyndalady. Osylaısha elimizdiń negizgi memlekettik ınstıtýttary tolyq jańǵyrtylady. Bul da aýqymdy reformalarymyzdyń óte mańyzdy bóligi. Al qazan aıynda men Konstıtýtsııanyń 46-babyna sáıkes Qazaqstan halqyna Joldaý jasap, aldaǵy josparymyzdy aıqyndaımyn, - degen bolatyn Memleket basshysy.

Memleketimizdiń aldynda turǵan naqty mindetter men josparlar jarııalanatyn alqaly jıynǵa Quryltaı depýtattary, ortalyq jáne jergilikti memlekettik organdardyń basshylary, Úkimettiń jáne Halyq Keńesiniń músheleri, qoǵam ókilderi men eńbekkerler qatysady.

Joldaý saǵat 11:00-den bastap respýblıkalyq telearnalardan, sondaı-aq Aqordanyń áleýmettik jelilerdegi resmı paraqshalarynan tikeleı efırde kórsetiledi. Onlaın translıatsııa Jibek Joly efırinde, sondaı-aq telearnanyń YouTube arnasynda jáne Kazinform saıtynda júredi. Sondaı-aq Joldaý mátinin agenttiktiń telegram arnasynan oqı alasyzdar.

Aıta keteıik, Memleket basshysy Qasym-Jomart Toqaevtyń munyń aldyndaǵy Joldaýy «Jasandy ıntellekt dáýirindegi Qazaqstan: ózekti máseleler jáne ony túbegeıli tsıfrlyq ózgerister arqyly sheshý» degen taqyryppen 2025 jylydń 8 qyrkúıeginde jarııalandy. 

Joldaýdaǵy tapsyrmalar negizinen tsıfrlyq transformatsııa, ınvestıtsııa tartý, óndiristi ártaraptandyrý, ınfraqurylymdy jańǵyrtý, sý jáne jer resýrstaryn tıimdi paıdalaný, sondaı-aq adamı kapıtaldy damytý baǵyttaryn qamtıdy.

Qazaqstandy úsh jyl ishinde jappaı tsıfrlyq elge aınaldyrýdy kózdegen Joldaý aıasynda tsıfrlandyrý men jasandy ıntellektini damytýǵa arnalǵan Tsıfrlyq kodeks pen «Digital Qazaqstan» atty tujyrymdamalyq qujat qabyldandy. Jasandy ıntellekt jáne tsıfrlyq damý mınıstrligi quryldy. Alatau City-ge arnaıy mártebe berý týraly Jarlyq ázirlenip, qalanyń basqarý rejımin, qarjylyq modelin jáne basqa da máselelerin retteıtin jeke zań qabyldandy.

Úkimet tarapynan nvestıtsııa tartý jónindegi naqty usynystar, bankterdiń qarajatyn ekonomıkanyń naqty sektoryna tartýdyń tıimdi tetikteri ázirlendi. Bankter týraly jańa zań kúshine endi.

«Keleshek mektepteri» jobasy iske asyp, oqýshylarǵa arnalǵan jasandy ıntellekt negizderi boıynsha oqý baǵdarlamalary men materıaldary ázirlendi. Qashyqtan oqytý men jasandy ıntellekt negizinde «Qazaq Digital Mektebi» modeli daıyndaldy. Jasandy ıntellekt boıynsha pánderdi barlyq baǵyt boıynsha bilim berý baǵdarlamalaryna mindetti túrde engizýdi kózdeıtin joǵary jáne joǵary oqý ornynan keıingi bilim berýdiń memlekettik jalpyǵa mindetti standartyna ózgerister engizildi. Al-Sana baǵdarlamasy arqyly shamamen 100 myń stýdent tehnologııalyq jobalarǵa tartyldy.