Qazaqstannyń zeınetaqy júıesinde reforma qalaı júzege asady
ASTANA. KAZINFORM – QR Ulttyq banki tóraǵasynyń orynbasary Vıtalıı Týtýshkın UB basshysy Tımýr Súleımenovtiń zeınetaqy júıesin reformalaý qajettigi týraly buǵan deıin aıtqan pikirine túsinik berdi.
«Zeınetaqy jınaqtaryn paıdalanýǵa qatysty ınvestıtsııalyq saıasatty túbegeıli ózgertý týraly aıtyp otyrǵan joqpyz. Bul rette, otandyq qarjylyq tetikteri de, shetel valıýtasy da bolady. Atap aıtqanda, qazir zeınetaqy jınaqtarynyń jetkilikti deńgeıde bolýyna názar aýdarylǵan. Sebebi osyǵan deıin zeınetaqy jınaqtaryn merziminen buryn alýǵa múmkindik jasalǵanyn, sondaı-aq jalpy halyqtyń zeınetaqy tabysynyń tómen ekenin eskerý kerek. Óte sırek tóleıtin nemese az tóleıtinder kóp», — dedi V. Týtýshkın Parlament Májilisinde tilshiler suraǵyna jaýap bere otyryp.
Onyń aıtýynsha, zeınetaqymen qamtamasyz etý júıesine tolyqtaı enbeı qalǵan azamattardy tartýdyń jańa tetikterin ázirlep, jınaqtardy ulǵaıtý múmkindikterin arttyrý qajet.
«Sonymen qatar, qandaı qosymsha elementter engizilip jatqanyna qatysty suraqtar da bar. Máselen, bıyldan bastap jumys berýshilerdiń mindetti zeınetaqy jarnalary engizildi. Bul óz kezeginde jınaqpen qamtamasyz etýdiń ósýine yqpal etedi. Onyń ústine, mehanızmniń ózi on jyl buryn qabyldanǵan, ıaǵnı tıisti ózgeristerdi qajet etedi. Halyqty zeınetaqy júıesimen qamtý etý tolyqqandy bolýy kerek. Óıtkeni qamtylmaǵandar zeınet jasyna jetkende kedeıshilik sheginde qalady», — dedń UB ókili.
Biraq V.Týtýshkın qazaqstandyqtardyń zeınetaqy kirisi qalaı ósetinin jáne qaıda ınvestıtsııalaý kerek ekenin naqty aıta almady.
«Men bul taqyryp boıynsha qazir naqty pikir aıtýǵa daıyn emespin, sebebi ol jumys endi ǵana bastaldy», — dedi Vıtalıı Týtýshkın.
Eske salsaq, jaqynda Ulttyq bank tóraǵasy Tımýr Súleımenov qazirgi qoldanystaǵy zeınetaqy júıesin reformalaý qajet bolatynyn aıtqan edi.
