Qazaqstannyń zamanaýı tehnologııalar salasynda bolashaǵy zor — sheteldik rejısser
ASTANA. KAZINFORM — Astana AI Film Festival ózin damytýǵa talpynǵan adamdar úshin úlken múmkindikke jol ashty. Bul týraly AAIFF-2026 halyqaralyq baıqaýynda laýreat atanǵan Ernest Desýmbıla aıtty.
— Rejısserlikpen birazdan beri aınalysyp júrmin. Buǵan deıin kórkem fılm túsirdim. Endi jasandy ıntellektimen jumys istep jatyrmyn. Daıyndaǵan týyndymdy osy baıqaýǵa arnaıy alyp keldim. Osyndaı baıqaý uıymdastyrylyp jatqanyn jubaıym aıtty. Alaıda ótinish qabyldaý merziminiń aıaqtalýyna nebári 10 kún ǵana qalǵan eken. Sondyqtan úlgerý úshin 10 kún ishinde festıvalge arnaıy fılm daıyndadym, — dedi Spain AI Platform kompanııasynyń art-dırektory Ernest Desýmbıla Jibek Joly telearnasyna bergen suhbatynda.
Osy oraıda ol Astanada ótken bul aýqymdy is-sharanyń nátıjesine óte rıza bolǵanyn aıtty.
— Astanaǵa kelgen sátten bastap erekshe áser aldym. Bul qala maǵan qatty unady. Eń bastysy, bul saladaǵy basqa da ónerli adamdarmen aralysyp, Qazaqstandaǵy adamdardyń qonaqjaılyǵyn sezindim. Astananyń biraz mańyzdy jerlerin aralaýǵa jaǵdaı jasaldy. Máselen, Eýropa qalalarynyń júzdegen jyldyq tarıhy bar ekenin eskersek, Qazaqstannyń nebári az ýaqyt ishinde osyndaı eńseli ári zamanaýı qala salǵany tańǵaldyrdy. Bul eldiń bolashaǵy zor, — dedi rejısser.
Buǵan deıin Memleket basshysy Astana AI Film Festival halyqaralyq kınofestıvalin ashqan edi.
Baıqaýǵa álemniń 125 elinen 8 067 ótinish túsip, ol jasandy ıntellekt kómegimen jasalǵan fılmder arasyndaǵy eń iri halyqaralyq baıqaýlardyń birine aınaldy.
Jasandy ıntellekt kómegimen túsirilgen fılmder festıvali 1-3 qazan aralyǵynda ótti. 3 qazanda marapattaý rásimi ótip, álemniń ár túkpirinen kelgen avtorlar men rejısserler arasyndaǵy halyqaralyq baıqaýdyń jeńimpazdary anyqtaldy.
