Qazaqstannyń veterınarııa salasyndaǵy tájirıbesi Dúnıejúzilik assambleıada tanystyrylady
ASTANA. KAZINFORM- Aýyl sharýashylyǵy mınıstri Aıdarbek Saparov Frantsııaǵa jumys sapary barysynda Dúnıejúzilik janýarlar densaýlyǵyn saqtaý uıymynyń Bas dırektory Emmanýel Sýbeıranmen kezdesti, dep habarlaıdy mınıstrliktiń baspasóz qyzmeti.
Kezdesý barysynda taraptar Qazaqstannyń veterınarııalyq júıesin odan ári nyǵaıtý, bıologııalyq qaýipsizdik boıynsha halyqaralyq standarttardy engizý, kadr daıarlaý jáne janýarlardyń transshekaralyq aýrýlarynyń aldyn alý salasyndaǵy óńirlik yntymaqtastyqty damytý máselelerin talqylady.
Aıdarbek Saparov Qazaqstannyń veterınarııa salasyn damytýǵa baǵyttalǵan kópjyldyq syndarly yntymaqtastyǵy men saraptamalyq qoldaýy úshin uıymǵa alǵys bildirdi.
Mınıstr Qazaqstan Dúnıejúzilik janýarlar densaýlyǵyn saqtaý uıymynyń halyqaralyq standarttaryn dáıekti túrde engizip kele jatqanyn atap ótti.
- Uıymnyń saraptamalyq jáne ádistemelik qoldaýy elimizdiń veterınarııalyq qyzmetin nyǵaıtýǵa eleýli úles qosty. Biz kadrlyq áleýetti arttyrýǵa, ınfraqurylymdy jańǵyrtýǵa jáne bıologııalyq qaýipsizdik deńgeıin kúsheıtýge erekshe mán berip otyrmyz. Bul birlesken jumys halyqaralyq standarttardy tıimdi engizýge jáne veterınarııalyq qaýip-qaterlerge jedel áreket etý júıesin damytýǵa múmkindik beredi, — dedi mınıstr.
Sondaı-aq Almatyda ótken veterınarııalyq bilim berýdi úılestirýge arnalǵan óńirlik semınardyń mańyzy aıtyldy. Semınar qorytyndysynda «Biryńǵaı densaýlyq» qaǵıdatynyń elementteri elimizdiń úsh jetekshi agrarlyq joǵary oqý ornynyń bilim berý baǵdarlamalaryna engizildi.
Halyqaralyq áriptestermen birlesip, veterınarııalyq standarttardy engizý, salanyń turaqtylyǵyn arttyrý jáne transshekaralyq bıologııalyq qaýipterdiń aldyn alý baǵytynda birqatar joba júzege asyrylyp jatyr.
Olardyń qatarynda kúıis qaıyratyn usaq janýarlar obasy, brýtsellez aýrýlaryn baqylaý, sondaı-aq antımıkrobtyq preparattardy utymdy qoldaný men monıtorıng júrgizý bastamalary bar.
Mınıstr Úkimettiń 2024–2026 jyldarǵa veterınarııalyq júıeni damytýǵa qosymsha ınvestıtsııalar qarastyrǵanyn aıtty. Qarjy ınfraqurylymdy jańǵyrtýǵa, zerthanalardy jabdyqtaýǵa, jańa nysandar salýǵa jáne veterınar mamandardyń eńbekaqysyn arttyrýǵa baǵyttalady.
Óz kezeginde uıymnyń Bas dırektory Qazaqstanmen áriptestik deńgeıiniń joǵary ekenin atap ótip, veterınarııalyq júıeni jetildirý baǵytyndaǵy jumysty oń baǵalady.
-Qazaqstan veterınarııalyq qyzmetti damytý men halyqaralyq standarttardy engizýde júıeli ári syndarly tásil ustanyp otyr. Biz óńirlik yntymaqtastyqty nyǵaıtýǵa jáne Ortalyq Azııanyń ǵylymı-dıagnostıkalyq áleýetin arttyrýǵa qosqan úlesin joǵary baǵalaımyz. Qazaqstannyń tájirıbesin 183 eldiń delegaty qatysatyn uıymnyń 93-shi Bas sessııasy aıasynda jáne Dúnıejúzilik assambleıanyń ashylýynda bólisý usynylady», — dedi Emmanýel Sýbeıran.
Kezdesý qorytyndysynda taraptar óńirlik jáne jahandyq bıologııalyq qaýipsizdikti nyǵaıtý maqsatynda yntymaqtastyqty odan ári keńeıtýge daıyn ekenderin bildirdi.
Sondaı-aq 20 mamyrda uıymnyń ǵylymı komıssııa otyrysy ótip, 21 mamyrda janýarlar aýrýlary boıynsha qolaıly mártebeler berý máseleleri jóninde daýys berý júrgiziletin bolady.
Osyǵan deıin Májilis veterınarııa mamandaryn áleýmettik qoldaýǵa 22 mlrd teńge bóletini týraly jazdyq.
