Qazaqstannyń Vatıkandaǵy elshisi Rım Papasyna senim gramotalaryn tapsyrdy
ASTANA. KAZINFORM — Qazaqstannyń Qasıetti Taq janyndaǵy elshisi Tımýr Prımbetov asa qasıetti Rım Papasy Frantsıskke senim gramotalaryn tapsyrdy.
Saltanatty shara Rım Papasynyń «Domus Santa Marta» rezıdentsııasynda ótti.
Resmı qabyldaý barysynda Rım-katolık shirkeýiniń basshysy qazaq dıplomatyn Qazaqstan Respýblıkasynyń Vatıkan memleketindegi elshiliginiń ashylýymen quttyqtap, tabysty jáne jemisti jumys atqarýdy tiledi.
Rım Papasy Frantsısk Qazaqstan Respýblıkasynyń Prezıdenti Qasym-Jomart Toqaevtyń 2024 jylǵy qańtardaǵy Vatıkanǵa resmı saparynyń qorytyndylaryn joǵary baǵalady jáne 2022 jylǵy qyrkúıektegi Qazaqstanǵa alǵashqy memlekettik (apostoldyq) sapary aıasynda kórsetilgen jyly jáne shynaıy qabyldaý úshin taǵy da alǵysyn jetkizdi.
Rım-katolık shirkeýiniń basshysy álemdik saıasat, ásirese kóshi-qon saıasaty sekildi eń ózekti máselelerdi sheshýde teń quqyly dıalogqa negizdelý qajet ekenin basa aıtty.
Tımýr Prımbetov, óz tarapynan, Qazaqstan Respýblıkasy Prezıdentiniń izgi tilekterin jetkizip, Memleket basshysynyń bastamasymen elimizde júrgizilip otyrǵan aýqymdy ózgerister týraly qysqasha aqparat berdi. Vatıkannyń Álemdik jáne dástúrli dinder lıderleri sezi men onyń Hatshylyǵynyń jumysyna qoldaý kórsetip, belsendi qatysqany úshin alǵys bildirdi. Rım Papasy Frantsıskke Qazaqstan Prezıdentiniń bıyl qyrkúıekte Astanada ótetin VIII Sezine arnaǵan jeke shaqyrýyn tabys etti.
Qabyldaý sońynda Rım Papasy Frantsısk Qazaqstan halqyna beıbitshilik, amandyq jáne órkendeý tiledi. Elimizdiń odan ári údemeli damýy men halyqaralyq arenadaǵy ustanymyn nyǵaıtý úshin áleýeti zor ekenin atap ótti.
Qazaqstan Respýblıkasy men Qasıetti Taq arasyndaǵy dıplomatııalyq qarym-qatynastar 1992 jyly 17 qazanda ornatyldy. Rım Papasy Ioann Pavel II Qazaqstan Respýblıkasyna alǵashqy apostoldyq saparyn 2001 jylǵy qyrkúıekte jasady. 2022 jylǵy qyrkúıekte Rım Papasy Frantsısk Álemdik jáne dástúrli dinder lıderleriniń VII seziniń ashylýyna qatysý úshin Qazaqstanǵa memlekettik (apostoldyq) saparmen keldi. 2024 jylǵy qańtarda Qazaqstan Prezıdenti Vatıkanǵa resmı saparmen bardy.
Osyǵan deıin Qazaqstan Elshisi Shvetsııa Koroline senim gramotalaryn tapsyrǵanyn jazǵan edik.