Qazaqstannyń úzdik ónertapqyshtary marapattaldy
Elordada ónertabys salasyndaǵy jetistikterdi pash etetin «Shapaǵat-2023» respýblıkalyq baıqaýynyń jeńimpazdary marapattaldy, dep habarlaıdy Kazinform.
Ónertabys salasyndaǵy jetistikter baıqaýy 2004 jyldan beri ótkizilip keledi. Jıyrma jylǵa jýyq ýaqyt aralyǵynda 200-ge jýyq otandyq ónertapqyshtar men zııaly qaýym «Shapaǵat» baıqaýynyń jeńimpazy atanǵan.
Al 2013 jyldan beri «Qazaqstan Respýblıkasynyń eńbek sińirgen ónertapqyshy» nomınatsııasy berilip keledi.
«Qurmetti qatysýshylar! "Shapaǵat" baıqaýy – talantty ónertapqyshtar men ratsıonalızatorlar úshin óz jetistikterin kórsetýge jáne eńbegi úshin marapat alýǵa biregeı múmkindik. Bıyl baıqaý 18-shi ret ótýde jáne osy ýaqyt ishinde ol ónertabys pen talanttyń naǵyz merekesine aınaldy. Jyl saıyn bul shara jańa ónertabystar men jańa tehnologııalar, ómirdi jaqsy jaqqa ózgerte alatyn serpindi jobalar jasaǵan júzdegen talantty adamdardyń basyn qosady. Búgin biz "Shapaǵat" baıqaýynyń jeńimpazdaryna qurmet kórsetemiz, olar ózderiniń talantymen jáne eńbekqorlyǵymen elimizdegi ónertapqyshtyq istiń damýyna baǵa jetpes úles qosýda. Bizdiń otandyq jańalyqtarymyz óndiris tıimdiligin arttyrýǵa, ómir súrý sapasyn jaqsartýǵa jáne elimizdiń órkendeýin nyǵaıtýǵa yqpal etetinine senimdimin. Sizderdi shyǵarmashylyq-ónertapqyshtyq belsendilik, oı qozǵalysy merekesimen quttyqtaımyn! Jańa jemister men tamasha sheshimderdiń oryndaýyn tileımin!», - dep quttyqtady QR Ádilet mınıstri Azamat Esqaraev saltanatty keshtiń ashylýynda.
Bıyl elimizdiń onnan astam óńirinen 150-den astam qatysýshy «Jyldyń eń úzdik ónertabysy», «Ónertapqysh áıel», «Úzdik ınnovatsııalyq kompanııa», «Jas ónertapqysh», «Jas daryn» nomınatsııalary boıynsha sondaı-aq «Qazaqstan Respýblıkasynyń eńbek sińirgen ónertapqyshy» qurmetti ataǵy úshin dodaǵa túsken bolatyn.
Jeńimpazdar konkýrstyq komıssııa otyrysynyń qorytyndysy boıynsha daýys berý arqyly anyqtalǵan. Komıssııa quramyna QR Prezıdenti janyndaǵy Ulttyq ǵylym akademııasy, «DARA» Prezıdenttik bastamalar qory, QR ǵylym jáne joǵary bilim mınıstrliginiń joǵary jáne joǵary oqý ornynan keıingi bilim komıteti, QR Densaýlyq saqtaý mınıstrligi, Halyqaralyq jasyl tehnologııalar jáne ınvestıtsııalyq jobalar ortalyǵy, «Atameken» UKP, «QazInnovations» ınnovatsııalyq damý ulttyq agenttigi, «QazTrade» saýda saıasatyn damytý ortalyǵynyń ókilderi engen.
Osylaısha «QR eńbek sińirgen ónertapqyshy» qurmetti ataǵy S.D. Asfendııarov atyndaǵy Qazaq ulttyq medıtsına ýnıversıteti travmatologııa jáne ortopedııa kafedrasynyń professory, medıtsına ǵylymdarynyń doktory Erǵalı Nábıevke berildi.
Jeńimpazǵa arnaıy lenta, estelik dıplom jáne 1 mlng teńge somasynda aqshalaı syıaqy tabys etildi.
«Jyl ónertabysy» nomınatsııasynda «Úlbi metallýrgııa zaýyty» aktsıonerlik qoǵamy jeńimpaz atandy. Bul zaýyt «Tıtan berıllıdinen iri gabarıtti daıyndama men buıym alý tásili» ónertabysyna №35417 patentiniń ıesi.
Avtorlary: Kolmakov M. G., Ýdartsev S. V. Arınova I.V., Zorın B.L., Fomınov G.ıÝ., Vechkýtov A.N., Bogachev V.A.
«Ónertapqysh hanym» atalymynda tehnıka ǵylymdarynyń doktory Sáýle Maratqyzy Bazarbaeva jeńimpaz atandy. Ol №35729 «Alynǵan ónimderdi qurylys materıaldaryna kádege jaratý arqyly shlamdarda hromdy (VI) detoksıkatsııalaý tásili» patentiniń birlesken avtory.
«Jas ónertapqysh» nomınatsııasynda PhD doktory Aleksandr Sergeevıch Barýkın jeńimpaz atandy. Ol birqatar patentterdiń ıelenýshisi jáne avtory.
«Úzdik ınnovatsııalyq kompanııa» nomınatsııasynda A.B. Bekturov atyndaǵy Hımııa ǵylymdary ınstıtýty jeńimpaz.
Bul uıym – 1997 jyly berilgen QR ónertabysyna alǵashqy patenttiń, sondaı-aq 1025 qorǵaý qujattarynyń, onyń ishinde 60 sheteldik, KSRO-nyń 40-tan astam, Reseı Federatsııasy men Eýrazııalyq patentteriniń ıegeri.
«Jas daryn» nomınatsııasynda Atyraý qalasy, IT-mektep-lıtseıiniń 11 synyp oqýshysy Qydyrbaı Qazybek jeńimpaz atandy. Ol «Gaz ben órtten qorǵaý júıesi» jobasynyń avtory.
Sonymen qatar, jas býyndy yntalandyrý maqsatynda «Jas daryn» nomınatsııasy boıynsha «Ónertabys salasyndaǵy ınnovatsııalyq jobalary úshin» 5 dıplomant anyqtaldy.
Olar – Pavlodar zııatkerlik mektebiniń oqýshylary Mıráli Ibraev, Zarına Segizbaeva, Oral qalasynan Nursultan Zınýllın, Taraz qalasynan Ádııa Kerimqulova, Astanadan Nurtóre Arnuruly, Almatydan Karolına Doskempirova.
Esterińizge sala keteıik «Shapaǵat» respýblıkalyq konkýrsyn jyl saıyn QR Ádilet mınıstrligi elimizdegi ónertapqyshtyq belsendilikti arttyrý maqsatynda ótkizip keledi.
