Qazaqstannyń úzdik qymyz óndirýshileri anyqtaldy
ASTANA. KAZINFORM – Astanada ótken aýqymdy «BaiQymyz – baptalǵan qymyz» gastrofestıvali óz deńgeıine jetti.
Uıymdastyrýshylardyń málimetinshe, qazaqtyń ulttyq sýsyny – qymyzǵa arnalǵan bul mádenı is-shara eki kún boıy 70 myńnan astam qonaqty qabyldap, qazaqı rýhtaǵy dám men dástúrdiń merekesine aınaldy.
Festıvaldiń eń mańyzdy sátteriniń biri – elimizdiń túkpir-túkpirinen kelgen qymyz óndirýshiler arasynda ótken «Eń úzdik qymyz» baıqaýy boldy. Jeńimpazdar festıval qonaqtarynyń daýys berýi arqyly anyqtalyp, qomaqty qarjylaı syıaqymen marapattaldy.
«Eń úzdik qymyz» baıqaýynyń jeńimpazdary:
• І oryn – Abaı oblysy Sarjal aýylynan «Janys» sharýa qojalyǵy – 20 mln teńge
• ІІ oryn – Qaraǵandy oblysy Qarqaraly aýdanynan «Qarynshı» sharýa qojalyǵy – 15 mln teńge
• ІІІ oryn – Aqmola oblysynan «Qabdýlın» sharýa qojalyǵy – 10 mln teńge.
Sondaı-aq arnaıy nomınatsııalar boıynsha da úzdikter marapattaldy:
• «Altyn kúbi» nomınatsııasy – Qaraǵandy oblysy, «Batyr rýh» – 1 mln teńge
• «Altyn qor» nomınatsııasy – Ulytaý oblysy, «Nomad milk» – 1 mln teńge
• «Kúmis torsyq» nomınatsııasy – Abaı oblysy, «Ádil qymyz» – 500 000 teńge
• «Tekti sýsyn – Kúmis shara» nomınatsııasy – Aqmola oblysy – 500 000 teńge.
Odan bólek festıval aıasynda «Er qanaty» atty jylqy kórmesi ótti. Atalǵan is-sharany 3 000-nan astam adam tamashalady. Elıtaly tuqymdar – gonnover, taza qandy aǵylshyn, orys jelisti, ahalteke jylqylary men qazaqy tuqymdar: jaby, muǵaljar, qostanaı, besqaraǵaı jáne «Uly dala joryǵy» báıgesiniń chempıondary kelýshiler nazaryn aýdartty.
Kórme jeńimpazdary:
• «Qazaqtyń eń sulý jylqysy» nomınatsııasy – Muǵaljar tuqymy
• «Qazaqtyń eń júırik jylqysy» nomınatsııasy – Qostanaı tuqymy
Eske salsaq, elordada «BaiQymyz» ulttyq taǵamdar gastrofestıvali ótti.
Baıqaýdyń maqsaty — elimizdegi eń sapaly ári shıpaly qymyzdy anyqtaý. Negizgi maqsat — qymyzdy densaýlyq pen qonaqjaılyqtyń sımvoly retinde tanytý, sonymen qatar agrotýrızm men jylqy sharýashylyǵyn damytýǵa serpin berý.
Sondaı-aq qymyz festıvaline el óńirlerinen 30 tonnaǵa jýyq qymyz ákelindi, osy oraıda uıymdastyrýshylar rekord ornaǵanyn aıtyp otyr.