Qazaqstannyń úzdik 20 týrıstik aımaǵyn damytý kartasy jasalady

Úkimet otyrysynda tıisti sala basshylaryna TOP-20 týrıstik aýmaqty damytýdyń jol kartasyn bekitý týraly tapsyrma berildi, dep habarlaıdy Kazinform.

«Týrızm jáne sport mınıstrligi óńir ákimdikterimen birlesip TOP-20 týrıstik aýmaqtardy damytý jónindegi jol kartalaryn bekitýi qajet.

Jergilikti tarıhı eskertkishter, kórkem tabıǵı peızajdar men halqymyzdyń basqa da ıgilikteri túgeldeı týrıstik ónimderge durys ıntegratsııalanýy qajet.

Mádenıet, Aýyl sharýashylyǵy jáne Ekologııa mınıstrlikterimen birlesip, mádenı, agro jáne ekotýrızmdi damytý boıynsha naqty tásilderdi ázirleý kerek», - dedi Premer-Mınıstr.

Sondaı-aq, Álıhan Smaıylov óńir ákimderine týrıstik obektilerdi qajetti ınfraqurylymmen qamtamasyz etip, týrısterdiń qaýipsizdigin arttyrýdy tapsyrdy.

«Týrızm jáne sport mınıstrligi Mádenıet, Syrtqy ister mınıstrlikterimen birlesip, shetelderde Qazaqstannyń týrıstik áleýeti týraly belsendi aqparattyq naýqan júrgizýdi qamtamasyz etýi qajet.

Týrızm jáne sport mınıstrligi Tsıfrlyq damý mınıstrligimen birlesip, týrızm salasyn tsıfrlandyrý jáne qyzmet kórsetý sapasyn arttyrý jónindegi is-sharalar josparyn bekitýge tıis.

Bul rette, sheteldik týrıstiń el aýmaǵyna kelgennen bastap, ketýine deıingi barlyq kezeńin tsıfrlandyrýdyń jáne ońaılatýdyń tolyq tsıklin, sondaı-aq ishki týrızmge arnalǵan qyzmetterdiń barlyq spektrin qamtý mańyzdy», - dedi Úkimet basshysy