Qazaqstannyń úzdik 10 sheberi «Ulttyq qolóner mektebi» jobasyna qatysady
ASTANA.KAZINFORM — «Kreatıvti ındýstrııalardy damytý qory» korporatıvtik qory dástúrli qolónerdi saqtaý, jańǵyrtý jáne jas urpaqqa úıretýge baǵyttalǵan «Ulttyq qolóner mektebi» respýblıkalyq jobasynyń qorytyndysyn shyǵardy.
Ashyq konkýrsqa Qazaqstannyń barlyq óńiriniń qolóner sheberlerinen 330 ótinim kelip tústi. Tehnıkalyq saraptamadan ótip, qaıtalanǵan ótinimder alynyp tastalǵannan keıin konkýrstyq komıssııa 271 ótinimdi qarady.
Іrikteý qorytyndysy boıynsha úzdik 10 sheber anyqtaldy. Olar jýyrda Astanadaǵy Qazaq Creative Hub bazasynda bilim berý baǵdarlamasyn bastaıdy. Sheberler 8-20 jas aralyǵyndaǵy balalar men jastarǵa ulttyq qolónerdiń qyr-syryn úıretedi.
Jobaǵa elimizdiń túkpir-túkpirinen qatysýǵa nıet bildirgender kóp boldy. Eń kóp ótinim ońtústik óńirlerden túsip, olardyń sany 137-ge jetti. Bul jalpy ótinimderdiń 51 paıyzyn quraıdy.
Baǵyttar boıynsha dástúrli toqyma óneri men kıiz basý isi kósh bastady. Atalmysh baǵytqa 121 ótinim (44,6%) tústi. Sondaı-aq sándik-qoldanbaly óner men etnodekorǵa – 42 ótinim (15,5%), ulttyq kıimder men aksessýarlar ázirleýge – 31 ótinim (11,4%), zergerlik ónerge 20 ótinim (7,4%) tústi.
Aıta ketelik qolóner sheberlerine arnalǵan grant baǵdarlamasyna ótinim qabyldanǵany týraly jazǵan edik.
