Qazaqstannyń úsh ýnıversıteti Azııadaǵy úzdik júzdikke kirdi
ASTANA. KAZINFORM — QS Quacquarelli Symonds halyqaralyq taldaý agenttigi Azııanyń úzdik ýnıversıtetteriniń QS Asia University Rankings 2027 reıtıngin jarııalady.
Qazaqstan Ortalyq Azııa elderi arasynda kóshbasshylyq ornyn saqtap, úsh ýnıversıteti reıtıngtiń alǵashqy júzdigine engen óńirdegi jalǵyz memleket atandy. Bıylǵy reıtıngke elimizdiń 51 joǵary oqý orny engizildi. Bul ótken jylmen salystyrǵanda jeti ýnıversıtetke artyq.
QS Asia University Rankings 2027 reıtıngine Azııanyń 26 eli men aýmaǵynan 1722 ýnıversıtet endi. Reıtıngke engizilgen joǵary oqý oryndarynyń sany boıynsha Qazaqstan Azııada 10-orynǵa turaqtady. Sońǵy úsh jylda reıtıngke qatysqan qazaqstandyq ýnıversıtetterdiń sany 34-ten 51-ge deıin artty. Onyń ishinde jeti joǵary oqý orny reıtıngke alǵash ret endi.
Azııanyń úzdik 100 ýnıversıtetiniń qataryna Qazaqstannyń úsh joǵary oqý orny kirdi:
Ál-Farabı atyndaǵy Qazaq ulttyq ýnıversıteti – 46-oryn;
L.N.Gýmılev atyndaǵy Eýrazııa ulttyq ýnıversıteti – 62-oryn;
Satbayev University – 89-oryn.
Qazaqstandyq joǵary oqý oryndary arasynda reıtıngtegi ornyn aıtarlyqtaı jaqsartqan ýnıversıtetterdiń biri – NU. Ýnıversıtet 62 satyǵa kóterilip, 139-orynǵa ıe boldy. Osylaısha, reıtıngke ekinshi jyl qatarynan qatysyp otyrǵan oqý orny Azııanyń úzdik 200 ýnıversıtetiniń qataryna endi. Sondaı-aq Sársen Amanjolov atyndaǵy Shyǵys Qazaqstan ýnıversıteti óz kórsetkishin 64 satyǵa jaqsartyp, 618-orynǵa kóterildi.
Qazaqstandyq ýnıversıtetter bilim berý ortasynyń sapasy, akademııalyq utqyrlyq jáne halyqaralyq yntymaqtastyq kórsetkishteri boıynsha joǵary nátıjelerge qol jetkizdi. Reıtıngtiń 11 ındıkatorynyń jeteýi boıynsha otandyq joǵary oqý oryndarynyń ortasha kórsetkishteri Azııa ýnıversıtetteriniń ortasha deńgeıinen joǵary boldy.
Atap aıtqanda, akademııalyq almasý baǵdarlamalary aıasynda shetelge shyǵatyn stýdentterdiń úlesi boıynsha Qazaqstannyń ortasha kórsetkishi 58,8 baldy qurady. Al Azııa boıynsha bul kórsetkish 22,6 balǵa teń. Oqytýshylar men stýdentter sanynyń araqatynasy boıynsha otandyq ýnıversıtetter orta eseppen 52 ball jınasa, Azııadaǵy ortasha kórsetkish 34,6 baldy qurady. Jumys berýshiler arasyndaǵy bedel kórsetkishi boıynsha qazaqstandyq joǵary oqý oryndary 38,8 balǵa qol jetkizip, Azııadaǵy ortasha deńgeıden (24,9 ball) joǵary nátıje kórsetti.
Elimizdiń jetekshi ýnıversıtetteri jekelegen ındıkatorlar boıynsha da joǵary oryndarǵa ıe boldy. Máselen, ál-Farabı atyndaǵy Qazaq ulttyq ýnıversıteti oqytýshylar men stýdentter sanynyń araqatynasy jáne akademııalyq almasý baǵdarlamalary boıynsha shetelge shyǵatyn stýdentterdiń úlesi jóninen Azııada 12-orynǵa turaqtady. Al akademık E.A.Bóketov atyndaǵy Qaraǵandy ulttyq zertteý ýnıversıteti sońǵy kórsetkish boıynsha 29-orynnan 18-orynǵa kóterildi.
Óz kezeginde NU halyqaralyq ǵylymı yntymaqtastyq ındeksi boıynsha 24-orynǵa, al sheteldik oqytýshylardyń úlesi boıynsha 26-orynǵa ıe boldy. Sheteldik oqytýshylardyń úlesi jóninen Satbayev University 34-orynǵa turaqtasa, ál-Farabı atyndaǵy Qazaq ulttyq ýnıversıteti 52-orynnan 40-orynǵa kóterildi.
Qazaqstandyq ýnıversıtetterdiń basqa da mańyzdy jetistikteri:
10 joǵary oqý orny oqytýshylar men stýdentter sanynyń araqatynasy boıynsha Azııanyń úzdik 100 ýnıversıtetiniń qataryna endi;
6 ýnıversıtet akademııalyq almasý baǵdarlamalary boıynsha shetelge shyǵatyn stýdentterdiń úlesi jóninen alǵashqy júzdikke kirdi;
7 joǵary oqý orny sheteldik oqytýshylardyń úlesi boıynsha úzdik 100 ýnıversıtettiń qatarynan oryn aldy;
Qazaqstandyq ýnıversıtetterdiń 48%-y sheteldik oqytýshylardyń úlesi boıynsha kórsetkishterin jaqsartty;
Joǵary oqý oryndarynyń 39%-y oqytýshylar men stýdentter sanynyń araqatynasy boıynsha nátıjelerin arttyrdy.
Halyqaralyq akademııalyq yntymaqtastyqtyń keńeıýi, sonyń ishinde Qazaqstanda sheteldik ýnıversıtetterdiń 30-dan astam fılıalynyń ashylýy bilim berý baǵdarlamalaryn damytýǵa, akademııalyq utqyrlyqty arttyrýǵa jáne otandyq joǵary oqý oryndarynyń halyqaralyq baılanystaryn nyǵaıtýǵa qosymsha múmkindikter týǵyzýda.
Reıtıng nátıjelerine pikir bildirgen QS Quacquarelli Symonds agenttiginiń aǵa vıtse-prezıdenti Ben Saýter Qazaqstannyń Ortalyq Azııadaǵy jetekshi ornyn saqtap otyrǵanyn atap ótti. Onyń aıtýynsha, NU ýnıversıtetiniń Azııadaǵy úzdik 200 joǵary oqý ornynyń qataryna enýi ǵylymı zertteýlerdi qoldaý men joǵary bilim berýdi ınternatsıonaldandyrýdyń mańyzyn kórsetedi. Sonymen birge ǵylymdy qarjylandyrý kólemin ulǵaıtýmen qatar, ǵylymı zertteýlerdiń halyqaralyq yqpalyn arttyrý negizgi mindetterdiń biri bolyp qala beredi.
QS Quacquarelli Symonds agenttiginiń óńirlik dırektory Sergeı Hrıstolıýbov ta Qazaqstannyń halyqaralyq reıtıngtegi ókildigi keńeıip kele jatqanyn atap ótti. Onyń aıtýynsha, QS Asia University Rankings 2027 reıtıngine elimizdiń 19 qalasynan 51 ýnıversıtet engen. Bul nátıje Almaty men Astananyń álemdegi úzdik stýdenttik qalalardyń QS Best Student Cities 2027 reıtıngindegi oryndarynyń jaqsarýymen qatar, Qazaqstannyń óńirlik bilim berý ortalyǵy retindegi halyqaralyq tanymaldyǵynyń artyp kele jatqanyn kórsetedi.
QS Asia University Rankings – QS Quacquarelli Symonds agenttigi ázirleıtin Azııa ýnıversıtetteriniń halyqaralyq reıtıngi. Joǵary oqý oryndary akademııalyq bedeli, túlekteriniń jumys berýshiler arasyndaǵy suranysy, bilim berý ortasynyń sapasy, ǵylymı-zertteý qyzmetiniń nátıjeliligi, halyqaralyq yntymaqtastyq jáne akademııalyq utqyrlyq deńgeıin qamtıtyn 11 ındıkator boıynsha baǵalanady.
Aıta ketelik JOO túlekterine memlekettik qyzmetke ornalasýdyń jańa joly ashyldy.
