Qazaqstannyń úsh ýnıversıteti alǵash ret QS 2026 reıtıngi tizimine endi
ASTANA. KAZINFORM — QS World University Rankings 2026 nátıjeleri jarııalandy. Bıylǵy reıtıngke Qazaqstannyń 20 joǵary oqý orny endi. Bul týraly Ǵylym jáne joǵary bilim mınıstrligi málim etti.
– Bul – elimizdiń joǵary bilim berý sapasynyń artyp kele jatqandyǵynyń aıqyn kórinisi. Reıtıngke engen úsh jańa ýnıversıtet – Sh.Esenov atyndaǵy Kaspıı tehnologııalar jáne ınjınırıng ýnıversıteti, M.Qozybaev atyndaǵy Soltústik Qazaqstan ýnıversıteti jáne Shákárim ýnıversıteti. Bul oqý oryndary alǵash ret álemdik reıtıngke kirip otyr, – dep jazdy vedomstvodan.
Sonymen qatar L.N.Gýmılev atyndaǵy Eýrazııa ulttyq ýnıversıteti alǵash ret jumys berýshiler arasyndaǵy bedel ındıkatory boıynsha álemniń úzdik 100 ýnıversıtetiniń qataryna kirdi. Sondaı-aq ál-Farabı atyndaǵy Qazaq ulttyq ýnıversıteti jáne basqa da 5 ýnıversıtet oqytýshylar men stýdentterdiń araqatynasy boıynsha 100 úzdik qatarynan oryn aldy. Bul kórsetkish oqý protsesiniń sapasy men jeke qatynasqa negizdelgen bilim berýdiń mańyzyn bildiredi.
Mınıstrliktiń dereginshe, jańa reıtıngte Abai University 628-oryndy ıelenip, ótken jylmen salystyrǵanda birden 43 pozıtsııaǵa joǵary kóterilgen (671–680 aralyǵy). Osylaısha, ýnıversıtet álemniń úzdik 650 joǵary oqý ornynyń qataryna kirip, Qazaqstannyń aldyńǵy qatarly úzdik 5 ýnıversıtetiniń biri retinde óz ornyn nyǵaıtty.
– Halyqaralyq sarapshylar QS atynan ýnıversıtetterdiń ǵylymı-zertteý qyzmetine qatysýy, halyqaralyq yntymaqtastyqty keńeıtýi jáne túlekterdiń uzaqmerzimdi perspektıvalary sekildi basym baǵyttarǵa nazar aýdarady. QS aǵa vıtse-prezıdenti Ben Saýterdiń aıtýynsha, Qazaqstan ýnıversıtetteri birneshe kórsetkish boıynsha oń dınamıka kórsetip otyr jáne olar álemdik deńgeıge umtylý jolynda jaqsy qadamdar jasap keledi, – delingen habarlamada.
QS aımaqtyq dırektory Sergeı Hrıstolıýbovtyń pikirinshe, sońǵy jyldary reıtıngke engen ýnıversıtetter arasynda aıyrmashylyq baıqalady. Birqatar aldyńǵy qatarly ýnıversıtetter júıeli damý jolyna túsken, al keıbir oqý oryndary jahandyq básekelestik jaǵdaıynda óz pozıtsııalaryn saqtap qalýda qıyndyqtarǵa tap boldy. Osy turǵyda oqytýshylar quramynyń sapasy, ǵylymı-zertteý jumystaryna qatysýy jáne halyqaralyq yntymaqtastyq eleýli ról atqarady.
Aıta ketý kerek, Azııa elderiniń arasynda Qazaqstan QS reıtıngindegi ýnıversıtetter sany boıynsha 10-oryndy ıelenip otyr. Bul tizimde Qytaı (72), Úndistan (54) jáne Japonııa (47) kósh bastap tur.
Buǵan deıin habarlanǵandaı, Qazaqstan joǵary bilim berý salasynda Azııadaǵy iri habtardyń birine aınalyp keledi. Sheteldik stýdentter ne sebepti bizdiń eldi tańdaıdy? Ǵylym jáne joǵary bilim mınıstrligi sheteldik stýdentterdi elimizge tartyp turatyn birneshe negizgi faktordy atap kórsetken edi.