Qazaqstannyń úsh óńirinde orman órti tirkeldi
ASTANA. KAZINFORM – 18 shildede Qazaqstannyń memlekettik orman qory aýmaǵynda úsh orman órti tirkeldi. Bul týraly Orman sharýashylyǵy jáne janýarlar dúnıesi komıteti habarlady.
Vedomstvonyń málimetinshe, órtterdiń bireýi Aqmola oblysynda, bireýi Pavlodar oblysyndaǵy «Baıanaýyl» memlekettik ulttyq tabıǵı parkinde, taǵy biri Shyǵys Qazaqstan oblysynda bolǵan.
Órt oshaqtaryn jedel anyqtaý jáne sóndirý jumystaryna memlekettik orman kúzetiniń qyzmetkerleri, «Qazavıaormanqorǵaý» RMK kúshteri, sondaı-aq qajet bolǵan jaǵdaıda Tótenshe jaǵdaılar mınıstrliginiń bólimsheleri jumyldyryldy.
– Orman órtterin oqshaýlaý jáne tolyq sóndirý jumystary jalǵasyp jatyr. Jaǵdaı turaqty baqylaýda, – delingen komıtet habarlamasynda.
Vedomstvo elimizdiń birqatar óńirinde joǵary órt qaýpi saqtalyp otyrǵanyn eskertip, azamattardy tabıǵat aıasynda órt qaýipsizdigi qaǵıdalaryn qatań saqtaýǵa, otty abaılap paıdalanýǵa jáne órttiń shyǵýyna sebep bolatyn áreketterge jol bermeýge shaqyrdy.
Aıta keteıik, «Semeı ormany» rezervatyndaǵy orman órti oqshaýlandy.
