Qazaqstannyń uny AQSh naryǵyna shyqty

ASTANA. KAZINFORM – Otandyq ónim qazirdiń ózinde Amazon jáne Walmart onlaın platformalarynda satylyp jatyr. Alǵashqy 50 tonna bıdaı uny Nıý-Iorkke jetkizilip, Eurasian Legacy brendimen tutynýshylarǵa usynyldy. Bul týraly Saýda jáne ıntegratsııa mınıstrliginiń baspasóz qyzmeti habarlady.

Bul – AQSh-ta ulttyq taýarymyzdy satýdyń jańa strategııasy aıasynda júzege asqan alǵashqy iri eksporttyq joba. 

Aldaǵy ýaqytta QazTrade qoldaýymen aı saıynǵy jetkizilim kólemin 100 tonnadan asyrý kózdelip otyr. QazTrade – QR Saýda jáne ıntegratsııa mınıstrligi janyndaǵy eksportty damytýǵa jaýapty biryńǵaı operator.

Amazon-daǵy qazaq unynyń baǵasy – 1,36 keli qaptamasy úshin $14,50. Qaptamada «Product of Kazakhstan» degen belgi bar. Bul belgi «Qazaqstanda jasalǵan» brendiniń tanymaldyǵyn arttyryp, ekologııalyq taza ári sapaly ónim jetkizýshi el retinde ımıdjimizdi qalyptastyrady.

Onlaın saýdadan bólek, qazir qazaqstandyq undy meıramhanalarǵa, kofehanalarǵa jáne jergilikti ashanalarǵa jetkizý jóninde kelissózder júrgizilýde. Sonymen birge, AQSh-tyń iri saýda jelileri – Costco, Whole Foods jáne Trader Joe’s dúkenderine shyǵý múmkindigi de qarastyrylyp jatyr.

– Biz unmen ǵana toqtap qalmaımyz. Qaraqumyq, granola, talqan, shokolad pen kakaony da tanystyrdyq. Nıý-Iork, Chıkago jáne Vashıngtondaǵy seriktesterimiz bul ónimderdiń sapasyn kórdi. Amerıkanyń naryǵyna shyǵý shilde aıynda Vashıngtonda QazTrade keńsesi ashylǵannan keıin múmkin boldy. Nátıjesinde dıstrıbıýtorlar men rıteılermen tikeleı jumys isteýge jol ashyldy. Endi osy qalalarda qazaqstandyq óndirýshilerdiń bıznes-mıssııasyn ótkizgen durys bolady dep otyrmyz. Bul seriktestermen baılanysty nyǵaıtyp qana qoımaı, tabıǵı ónimderdi joǵary baǵalaıtyn HoReCa segmentine shyǵýǵa múmkindik beredi, - dedi QazTrade bas dırektory Aıtmuhammed Aldajarov. 

Turaqty kelisimsharttar jasalsa, aı saıyn 100 tonnadan astam un jetkizý josparlanyp otyr. Bul Qazaqstanǵa AQSh-tyń dándi daqyldar naryǵynda óz ornyn alýǵa jol ashady.

Aıta keterligi, munda tabıǵı jáne sertıfıkattalǵan ónimderge suranys árdaıym joǵary. 

Eske sala keteıik, buǵan deıin Qazaqstanda 11,6 mln tonna astyq jınalǵanyn jazǵan edik.