Qazaqstannyń Ulttyq pavılony: Venetsııa bıennalesine úsh joba fınalǵa ótti
ASTANA. KAZINFORM — Qazaqstan Respýblıkasynyń Ulttyq pavılony aıasynda 61‑shi Venetsııa bıennalesinde kórme ótkizý konkýrsynyń birinshi kezeńiniń nátıjesi belgili boldy. Bul týraly Mádenıet jáne aqparat mınıstrligi málim etti.
Vedomstvonyń málimetinshe, barlyǵy 17 ótinish túsken, olardyń 12-si irikteýden ótken.
Qazylar alqasynyń baǵalaýy boıynsha úsh fınalıst anyqtaldy:
«QONGYR: tynyshtyq arhıvi» tujyrymdamasy
Jetekshisi: Syrlybek Bekbotaev
«Qoñyr» tujyrymdamasy
Jetekshileri: Ásel Ahmetjanova, Ásel Muqasheva jáne Malıka Orazǵalıeva
«Sý tánderiniń jyry»
tujyrymdamasy
Jetekshileri: Áıgerim Qapar jáne Asyl Ishahova
Fınalǵa ótken úsh joba baıqaýdyń ekinshi kezeńine joldama alyp, qazylar alqasymen onlaın formatta kezdesti.
9 qańtar kúni Qazaqstandy 61‑shi Venetsııa bıennalesinde tanystyratyn joba anyqtalady.
Ulttyq pavılonnyń komıssary – Qazaqstan Respýblıkasy Premer‑mınıstriniń orynbasary – mádenıet jáne aqparat mınıstri Aıda Balaeva.
Eske sala keteıik, Qazaqstan alǵash ret Venetsııa bıennalesinde óz pavılonyn 2022 jyly usyndy.
