Qazaqstannyń ulttyq pavılony Bett UK 2026 halyqaralyq kórmesinde tanystyryldy
ASTANA.KAZINFORM — QR Ǵylym jáne joǵary bilim mınıstri Saıasat Nurbek Ulybrıtanııadaǵy Bett UK 2026 halyqaralyq kórmesine qatysyp, sondaı-aq jetekshi ýnıversıtetter, ǵylymı ortalyqtar men álemdik tehnologııalyq kompanııalardyń ókilderimen birqatar kezdesý ótkizip jatyr.
Ǵylym jáne joǵary bilim mınıstrligi málimetinshe, birinshi kúnniń basty oqıǵasy mınıstrdiń Bett UK 2026 — Leading EdTech kórmesine qatysýy boldy. Bul — bilim berý tehnologııalary salasyndaǵy eń iri halyqaralyq platformalardyń biri. Kórme jyl saıyn memlekettik organdardyń, bilim berý mekemeleriniń, tehnologııalyq kompanııalardyń jáne sarapshy qaýymdastyqtardyń ókilderin jınap, bilimniń bolashaǵy, oqý protsesiniń tsıfrlyq transformatsııasy, jasandy ıntellektini engizý jáne ınnovatsııalyq sheshimderdi qoldaný máselelerin talqylaýǵa múmkindik beredi.
21 qańtarda Londonda QR Ǵylym jáne joǵary bilim mınıstrligi uıymdastyrýymen Qazaqstannyń ulttyq pavılonynyń ashylý rásimi ótti. Ulttyq pavılon joǵary jáne odan keıingi bilim júıesin damytýdaǵy basym baǵyttardy kórsetýge arnalǵan alańǵa aınaldy. Munda bilim berý protsesterin tsıfrlandyrý, jasandy ıntellekt negizindegi sheshimderdi engizý, ǵylymı zertteýlerdi damytý jáne halyqaralyq akademııalyq yntymaqtastyqty keńeıtý sııaqty baǵyttar tanystyryldy.
Pavılon jumysyna 9 qazaqstandyq joǵary jáne joǵary oqý ornynan keıingi bilim berý uıymy qatysyp, ózderiniń akademııalyq baǵdarlamalaryn, ǵylymı-zertteý jobalaryn jáne sheteldik seriktestermen birlesken bilim berý jáne ǵylymı bastamalardy júzege asyrý múmkindikterin usyndy. Ekspozıtsııa otandyq ýnıversıtetterdiń damýynyń joǵary deńgeıin, olardyń ǵylymı-bilim berý áleýetin jáne halyqaralyq qaýymdastyqpen belsendi ózara árekettesýge daıyn ekenin kórsetti.
Kórme aıasynda plenarlyq sessııalar, taqyryptyq pikirtalastar, jetekshi EdTech ázirlemeleriniń tanystyrylymdary, sondaı-aq memlekettik organdar, ýnıversıtetter men jahandyq tehnologııalyq kompanııalardyń ókilderi arasyndaǵy iskerlik kezdesýler ótip jatyr.
Qazaqstan delegatsııasynyń Bett UK 2026 kórmesine qatysýy elimizdiń tsıfrlyq bilimdi damytý, jasandy ıntellekt tehnologııalaryn belsendi engizý jáne ınnovatsııalyq bilim berý sheshimderin ilgeriletý boıynsha strategııalyq baǵytyn aıqyndaıdy. Bul halyqaralyq yntymaqtastyqty nyǵaıtýǵa, qazaqstandyq ýnıversıtetterdiń básekege qabilettiligin arttyrýǵa jáne Qazaqstandy bilim berý men tsıfrlyq tehnologııalar salasynda óńirlik kóshbasshy retinde qalyptastyrýǵa septigin tıgizedi.
Aıta keteıik, Arman Shaqqalıev Berlındegi Grüne Woche kórmesinde Qazaqstannyń Ulttyq pavılonyn ashty.