Qazaqstannyń ulttyq quramasy EuroSkills Herning 2025 chempıonatyna qatysady

ASTANA. KAZINFORM — 2025 jylǵy 9-13 qyrkúıek aralyǵynda Danııanyń Hernıng qalasynda kásibı sheberlik boıynsha IX Eýropalyq chempıonat — EuroSkills Herning-2025 ótedi. Bul týraly Oqý-aǵartý mınıstrliginiń baspasóz qyzmeti habarlady. 

Eýropadaǵy eń iri jastar saıysyna Qazaqstan Respýblıkasynyń ulttyq quramasy da qatysady. 

EuroSkills — jumysshy mamandyqtaryn nasıhattaýǵa, tehnıkalyq jáne kásiptik bilimniń bedelin arttyrýǵa baǵyttalǵan halyqaralyq WorldSkills qozǵalysynyń bir bóligi. Bıylǵy chempıonatqa 32 elden 597 qatysýshy men 528 sarapshy qatysady. Baıqaý 38 quzyrettilik boıynsha ótedi.

Qazaqstan quramasyna 59 qatysýshy endi: 28 saıysqa túsýshi, 25 sarapshy, sondaı-aq resmı delegattar men tım-lıderler. Bizdiń stýdentterimiz 25 quzyrettilik boıynsha — ІT jáne ınjenerııadan bastap qurylys, sulýlyq ındýstrııasy, aspazdyq jáne servıs salasyna deıingi baǵyttarda óz sheberligin kórsetedi.

Ulttyq quramanyń EuroSkills Herning-2025 chempıonatyndaǵy óner kórsetýi Qazaqstandaǵy TjKB júıesin damytýda, halyqaralyq yntymaqtastyqty nyǵaıtýda jáne elimizdiń ımıdjin Eýropa arenasynda ilgeriletýde mańyzdy qadam bolmaq.

Aıta ketelik bilim berý salasynda jasandy ıntellektini qoldanýdyń etıkalyq standarty bekitildi.