Qazaqstannyń ulttyq quramasy Balqan matematıka olımpıadasyna qatysady
ASTANA. KAZINFORM – 3-8 mamyr aralyǵynda Gretsııanyń Salonıkı qalasynda Balqan matematıka olımpıadasy (Balkan Mathematical Olympiad – BMO) ótedi.
Olımpıadanyń negizgi maqsaty - oqýshylardyń matematıkalyq qabiletterin shyńdaý, ǵylymı oılaý mádenıetin qalyptastyrý jáne qatysýshy memleketter arasyndaǵy akademııalyq baılanysty nyǵaıtý.
Jarysqa Albanııa, Bosnııa jáne Gertsegovına, Bolgarııa, Kıpr, Gretsııa, Soltústik Makedonııa, Chernogorııa, Moldova, Rýmynııa, Serbııa jáne Túrkııa elderi turaqty túrde qatysady. Sonymen qatar, jyl saıyn Azııa men Eýropanyń birqatar memleketteri qonaq el retinde shaqyrylady. Bıylǵy jarysqa barlyǵy 25 memleketten 150-den astam oqýshy qatysady.
Qazaqstan bul olımpıadaǵa turaqty túrde qatysyp keledi. Osy ýaqyt aralyǵynda ulttyq qurama joǵary nátıjeler kórsetip, halyqaralyq reıtıngte óz ornyn qalyptastyrdy.
Qazaqstan quramasynyń músheleri:
Mýrat Tımýr – Almaty qalasyndaǵy Haileybury mektebiniń 12-synyp oqýshysy;
Beıganov Batyrhan – Almaty qalasyndaǵy Respýblıkalyq fızıka-matematıka mektebiniń 10-synyp oqýshysy;
Erkebulanuly Alı – Almaty qalasyndaǵy Haileybury mektebiniń 11-synyp oqýshysy;
Alıasqar Sultanáli – Astana qalasyndaǵy «Bilim-ınnovatsııa» lıtseı-ınternatynyń 10-synyp oqýshysy;
Ansatov Arnur – Qyzylorda oblystyq S. Shaýhamanov atyndaǵy №9 «Bilim-ınnovatsııa» lıtseı-ınternatynyń 11-synyp oqýshysy;
Orynbasar Berdibek – Atyraý oblystyq «Bilim-ınnovatsııa» lıtseı-ınternatynyń 11-synyp oqýshysy.
Qazaqstan quramasynyń jetekshileri:
Asylbek Isahov - Qazaq-Amerıka ýnıversıtetiniń prezıdenti;
Muhtar Qabaq - Nazarbaev Zııatkerlik mektebi «Astana-Nura» fılıalynyń mamany.
Balqan matematıkalyq olımpıadasyna qatysý qazaqstandyq oqýshylar úshin Halyqaralyq matematıka olımpıadasyna (IMO) daıyndyqtyń mańyzdy kezeńi sanalady. Atalǵan doda 2026 jylǵy 10-21 shilde aralyǵynda Shanhaı qalasynda ótedi.
Aıta ketelik Qazaqstandyq stýdentter ázirlegen JI jobasy Nıý-Iorkte jeńiske jetti.
