Qazaqstannyń ulttyq kıimderi Seýlde úlken qyzyǵýshylyq týǵyzdy
SEÝL. KAZINFORM — Ortalyq Azııa men Koreıa Respýblıkasy Dostyq kúnine oraı ótken is-shara aıasynda dástúrli kıimder kórsetilimi uıymdastyrylyp, óńir elderi men Koreıanyń mádenı alýan túrliligi men baı shyǵarmashylyq dástúrleri kórsetildi. Bul týraly SІM málim etti.
Vedomstvonyń málimetinshe, is-shara Ortalyq Azııa men Koreıa Respýblıkasy Dostyq qaýymdastyǵynyń qoldaýymen oryn aldy. Saltanatty rásimge Qaýymdastyq Prezıdenti Lı Ok Ren, Azııa mádenı ortalyǵynyń Prezıdenti Kım Sang Ýk, Ortalyq Azııa elderiniń dıplomattary, isker toptardyń ókilderi jáne shyǵarmashylyq ujymdar qatysty.
Quttyqtaý sózinde Qazaqstan Elshisi Nurǵalı Arystanov Ortalyq Azııa men Koreıa arasyndaǵy mádenı baılanystardyń qarqyndy damyp kele jatqanyn atap ótti. Ol óner, mýzyka jáne kreatıvti ındýstrııa salasyndaǵy birlesken jobalar elder arasyndaǵy dostyqty nyǵaıtýǵa yqpal etetinin basa aıtty.
— Qazaq dıplomaty Memleket basshysynyń Joldaýyndaǵy negizgi baǵyttarmen tanystyryp, Jasandy ıntellekt pen tsıfrlyq damý mınıstrligin qurý bastamasyna, sondaı-aq kreatıvti ındýstrııaǵa ozyq tehnologııalardy engizý máselesine erekshe nazar aýdardy. Elshi bıyl Koreıada tanystyrylatyn «Alataý Sıtı» jobasynyń mańyzdylyǵyn atap ótip, onyń smart-qalalardy damytýdaǵy, jasyl bastamalardy ilgeriletýdegi jáne týrızmdi órkendetýdegi rólin erekshe atady. 2025 jylǵy shildede Qazaqstan Prezıdenti Qasym-Jomart Toqaev pen Koreıa Prezıdenti Lı Chje Men telefon arqyly sóılesý barysynda saýda jáne ınvestıtsııalyq yntymaqtastyqqa basa nazar aýdara otyryp, jan-jaqty ózara is-qımyldy jalǵastyrýǵa ýaǵdalasty, — delingen habarlamada.
Óz kezeginde Qaýymdastyq Prezıdenti Lı Ok Ren Ortalyq Azııa elderiniń baı mádenıeti, ózindik dástúrleri men san qyrly mýzykasy Koreıada jyly qabyldanyp, ózara túsinistikti nyǵaıtýǵa yqpal etip jatqanyn tilge tıek etti.
Qazaqstannan «Tarbiya» brendiniń ulttyq kostıýmder toptamasy tanystyryldy. Bul toptama dástúrli elementter men zamanaýı estetıkany úılestirip, koreılik kórermenderdi tánti etti jáne joǵary baǵaǵa ıe boldy.
Kórsetilim Ortalyq Azııa men Koreıa Respýblıkasy halyqtaryn odan ári jaqyndastyrýǵa yqpal etetin tabysty yntymaqtastyq pen mádenı almasýdyń jarqyn úlgisine aınaldy.
Eske sala keteıik, buǵan deıin Mańǵystaý turǵyndary ulttyq kıimnen álemdik rekord ornatqan bolatyn.