Qazaqstannyń Ulttyq banki bazalyq mólsherlemege qatysty sheshim jasady
ASTANA. KAZINFORM — QR Ulttyq banki bazalyq mólsherlemege qatysty sheshim jasap, ony 14,25% deńgeıinde saqtap qaldy.
«Osy jylǵy shildede ınflıatsııa azdap ósti. Degenmen, ol Ulttyq banktiń boljamy aıasynda qalyptasty. Aılyq ınflıatsııa men onyń ornyqty bóligi edáýir qarqyn aldy. Damyǵan elderdegi ortalyq bankterdiń tejeý saıasaty nátıjesinde jahandyq ınflıatsııa baıaýlap keledi. Fıskaldyq yntalandyrý kóleminiń ósýi, turǵyn-úı kommýnaldyq qyzmetteriniń (TKQ) reformasy aıasynda tarıfterdiń ósýiniń jalǵasýy, ornyqty ishki suranys, sondaı-aq joǵary ınflıatsııalyq jaǵdaılar esebinen ekonomıkada proınflıatsııalyq qysym kúsheıdi. Ortamerzimdi keleshekte ınflıatsııa boıynsha 5%-dyq maqsatqa jetý ustamdy qatań aqsha-kredıt sharttaryn uzaq ýaqyt boıy ustap turýdy talap etedi. Táýekelder teńgerimi proınflıatsııalyq jaqqa aýyp, 2024 jyldyń sońyna deıin bazalyq mólsherlemeni búgingideı deńgeıde saqtaý yqtımaldyǵyn arttyrýǵa sebepshi bolyp tur», - delingen UB málimetinde.
Jyldyq ınflıatsııa 2024 jylǵy shildede 8,6%-ǵa deıin ósip, Ulttyq banktiń boljamy sheginde qalyptasty. «Tarıfti ınvestıtsııaǵa aıyrbastaý» baǵdarlamasyn iske asyrý aıasynda retteletin qyzmetter baǵasy ósip keledi. Naryqtyq qyzmetter qunynyń aıtarlyqtaı ósýi, óńdeý ónerkásibindegi óndirýshiler baǵasynyń ósýi jáne aıyrbastaý baǵamynyń álsireýi esebinen ınflıatsııa qarqyn aldy. Sonymen qatar, aýyl sharýashylyǵy ónimderi baǵasynyń tómendeý dınamıkasy baıaýlady. Aılyq ınflıatsııa shildede ortasha tarıhı máninen (0,3%) edáýir joǵary qalyptasyp, 0,7%-ǵa deıin ósti.
Jahandyq ınflıatsııa jetekshi ortalyq bankterdiń tejeýshi aqsha-kredıt saıasatynyń áserinen baıaýlap keledi. Azyq-túliktiń álemdik baǵasy jyldyq mánde tómendeı tústi. Alaıda, onyń qarqyny baıaý. Astyq baǵasy birtindep tómendeý múmkin.
«Boljamnyń bazalyq stsenarııinde Brent markaly munaı baǵasy 2024 jyly orta eseppen 1 barrel úshin 84,5 AQSh dollary deńgeıinde turaqtanady dep kútiledi. Buǵan OPEK+ munaı óndirisin azaıtý merzimin uzartýy, AQSh-taǵy óndirý kóleminiń birqalypty ósýi jáne Taıaý Shyǵystaǵy geosaıası belgisizdik negiz boldy. Ortamerzimdi perspektıvada munaı óndirý deńgeıiniń ósýin jáne álemdik ekonomıkanyń damý boljamdaryn eskere otyryp, munaı baǵasynyń 2025 jyly orta eseppen 82,5 AQSh dollaryna deıin jáne 2026 jyly orta eseppen 77,5 AQSh dollaryna deıin birtindep tómendeýi kútiledi. 2024-2025 jyldarǵa arnalǵan ınflıatsııa boljamy tıisinshe 7,5-9,5% jáne 5,5-7,5% aralyǵynda saqtaldy. 2026 jyly ınflıatsııa 5-7% deńgeıinde bolýy múmkin. Ustamdy qatań aqsha-kredıt saıasatyn júrgizý 2026 jyly bazalyq ınflıatsııanyń 5%-ǵa deıin baıaýlaýyna yqpal etetin bolady», - dep atalyp ótken Ulttyq bank aqparatynda.
Sonymen qatar, 2024 jylǵa Qazaqstan ekonomıkasynyń ósý boljamy 3,5-4,5% deńgeıinde, 2026 jylǵa 4,9-5,9% deńgeıinde saqtaldy. 2025 jylǵa boljam 5-6%-ǵa deıin biraz kóterildi. 2024-2026 jyldary JІÓ-niń ósýi negizinen ishki suranys esebinen, onyń ishinde fıskaldyq yntalandyrýdyń ósýi aıasynda qamtamasyz etiletin bolady.
QR Ulttyq bankiniń Aqsha-kredıt saıasaty komıtetiniń bazalyq mólsherleme boıynsha kezekti josparly sheshimi 2024 jylǵy 11 qazanda Astana ýaqytymen saǵat 12:00-de jarııalanady.
