Qazaqstannyń Túrikmenstanǵa aýyl sharýashylyǵy taýarlary eksportynyń kólemi ósti
ASTANA.KAZINFORM - Qazaqstan Respýblıkasynyń Premer-mınıstri Oljas Bektenov Ashhabad qalasynda (Túrikmenstan) Táýelsiz Memleketter Dostastyǵy úkimetteri basshylary keńesiniń otyrysyna qatysty, dep habarlaıdy Úkimettiń baspasóz qyzmeti.
Bıyl Dostastyqqa Túrikmenstan Respýblıkasynyń tóraǵalyq etýde. TMD ÚBK otyrysy bastalar aldynda Túrikmenstan Prezıdenti Serdar Berdimuhamedov úkimettik delegatsııalar basshylaryn qabyldady.
Ekijaqty kezdesý barysynda Oljas Bektenov Qazaqstan Prezıdenti Qasym-Jomart Toqaevtyń atynan túrikmen halqynyń ulttyq kóshbasshysy, Túrikmenstan Halk Maslahatynyń tóraǵasy Gýrbangýly Berdimuhamedov pen Túrikmenstan Prezıdenti Serdar Berdimuhamedovke jyly lebizin jetkizdi.
Kezdesýde saýda-ekonomıkalyq jáne kólik-tranzıttik yntymaqtastyq, sondaı-aq energetıka, aýyl sharýashylyǵy salalaryndaǵy ózara is-qımyl máselelerine nazar aýdaryldy. 2026 jylǵy qańtar-naýryz aılarynda Qazaqstan men Túrkimenstan arasyndaǵy ózara saýda kólemi $125,3 mln-dy qurady. Bul rette eksport qazaqstandyq aýyl sharýashylyǵy ónimderin jetkizýdi ulǵaıtý esebinen 15%-ǵa ósti. Qazaqstan Úkimeti men Túrkimenstan Mınıstrler kabıneti eki memleket basshylary júktegen taýar aınalymyn arttyrý jónindegi mindetter josparly túrde júzege asyrylyp kele jatqany atap ótildi.
TMD ÚBK otyrysyna Ázerbaıjan, Belarýs, Qyrǵyzstan, Reseı, Tájikstan, Ózbekstan úkimetteriniń basshylary, Túrkimenstan men Armenııanyń ókilderi, sondaı-aq TMD-nyń Bas hatshysy qatysty.
Dástúr boıynsha otyrys shaǵyn jáne keńeıtilgen quramda ótti.
Osyǵan deıin TMD elderiniń Úkimet basshylary Túrikmenstan astanasynda kezdesetini týraly jazdyq.
