Qazaqstannyń Túrkııaǵa salǵan ınvestıtsııasynyń kólemi 2,5 mlrd dollardan asty

ASTANA. KAZINFORM — Qazir elimizde 4 myńǵa jýyq túrik kompanııasy jumys isteıdi. Olarmen birlesip, quny 6 mlrd dollar bolatyn birqatar joba júzege asyrdyq, dep málimdedi Memleket basshysy Qasym-Jomart Toqaev.

Onyń aıtýynsha, bul jobalar energetıka, qurylys, ónerkásip, aýyl sharýashylyǵy, ınfraqurylym, medıtsına, týrızm sekildi mańyzdy salalardy qamtıdy. Qazaqstannyń Túrkııaǵa salǵan ınvestıtsııasynyń kólemi 2,5 mıllıard dollardan asty.

— Biz ashyq ári senimdi seriktes retinde túrik ınvestorlaryn qoldaýǵa árqashan daıynbyz. Sondyqtan Túrkııa kompanııalaryn uzaq merzimge arnalǵan iri jobalarǵa atsalysýǵa shaqyramyn. Kólik-logıstıka salasyndaǵy baılanysty kúsheıtýge múmkindik mol. Biz elderimizdiń strategııalyq turǵydan utymdy jerde ornalasqanyn barynsha tıimdi paıdalanýymyz kerek. Qazir Eýropa men Qytaı arasynda qurlyq jolymen tasymaldanatyn júktiń shamamen 85 paıyzy Qazaqstan arqyly ótedi. Osy rette Transkaspıı halyqaralyq kólik baǵdaryn, ıaǵnı, «Orta dálizdi» damytýdyń mán-mańyzy zor. Bul — eki eldiń múddesine saı keletin bastama. Qazaqstan temirjoldy jańǵyrtý, avtokólik joldaryn salý, sondaı-aq Kaspıı teńizinde keme qatynasyn jandandyrý úshin ınfraqurylymdy jetildirý jumysyn qolǵa aldy. Túrik ınvestorlaryn osy jobalarǵa belsene qatysýǵa shaqyramyz. Úkimetimiz Túrkııa kásipkerlerine arnaıy jeńildikter usynýǵa ázir, — dedi Prezıdent.

Kelissóz barysynda taraptar energetıka salasynyń mańyzyna da arnaıy toqtaldy.

— Qazir Baký — Tbılısı — Jeıhan qubyry arqyly jylyna 1,4 mıllıon tonna qazaq munaıy Túrkııaǵa tasymaldanady. Biz onyń kólemin arttyrý máselesin talqyladyq. «Turkiye Petroleum» kompanııasynyń Qazaqstan naryǵynda jumys isteýge nıeti bar. Biz muny quptaımyz. Energııa kózderin ártaraptandyrý, jańa elektr stantsııalaryn salý jáne basqa jobalardy júzege asyrý úshin túrik kompanııalarynyń tájirıbesine súıenip, ınvestıtsııalyq múmkindikterin paıdalanýǵa múddelimiz. Іri jobalardy birlese júzege asyrýǵa daıynbyz, — dedi Memleket basshysy.

Prezıdent aýyl sharýashylyǵyn taǵy bir mańyzdy sala retinde atady. Bul rette Qasym-Jomart Toqaev Qazaqstan Túrkııanyń azyq-túlik qaýipsizdigin qamtamasyz etýge súbeli úles qosyp kele jatqanyn atap ótip, astyq jáne basqa da aýyl sharýashylyǵy ónimderin eksporttaý máselesi jan-jaqty talqylanǵanyn jetkizdi. Qazaqstan aýyl sharýashylyǵyn tsıfrlandyrý, ónimdilikti arttyrý jáne óńdeý ónerkásibin órkendetý isinde Túrkııanyń joǵary tehnologııasyn paıdalanýǵa qyzyǵýshylyq tanytady. 

Buǵan deıin habarlanǵandaı, Qasym-Jomart Toqaev pen Rejep Taııp Erdoǵan BAQ ókilderi úshin brıfıng ótkizdi.